Akfør.fo - Ein nýggj ókeypis tænasta til øll
Endamálið við Akfør.fo er at savna allan brúktbila-marknaðin í Føroyum á einum stað.
Heimasíðan hevur hentar funkur, ið gera tað skjótt og ómakaleyst at finna bilin, ið passar til júst tín tørv.
Trupulleikin hevur verið, at marknaðurin var ógvuliga uppdeildur, og torførur at fáa yvirlit yvir. Tú noyddist at leita á heimasíðum hjá ymsum bilasølum, bila-útleigarum, Torg, Rótikassanum og øðrum facebookbólkum, fyri at síggja hvat var til sølu. “Hetta helt eg vera ov møtumikið, og setti mær fyri at menna eina brúkaravinaliga loysn fyri keyparar og seljarar”, sigur Bárður Mikkelsen, ein av umsitarunum av akfør.fo. Um vit hyggja í londunum rundanum okkum, hava tey øll eina loysn sum gevur eitt greitt yvirlit yvir brúkt akfør til sølu. Í Danmark hava tey bilbasen.dk, í Íslandi hava tey bilasolur.is, og í Føroyum hava vit nú akfør.fo
Føroyskt økisnavn:
Navnið á síðuni bleiv akfør.fo, tí at hendan tænastan vendir sær beinleiðis til føroyska marknaðin. Av tí at tað í ár gjørdist møguligt at hava eitt økisnavn ella leinkju við føroyskum stavum, valdu vit at kalla heimasíðuna www.akfør.fo við "ø".
Móttøkan hevur verið sera góð. Tíðin ið tænastan hevur verið virkin vísir, at stórur tørvur tykist vera á slíkari tænastu. Longu nú, ein mánað eftir at heimasíðan varð almannakunngjørd, hava heilt nógv vitjandi verið á síðuni og næstan allar bilasølurnar hava játtað at vera við. Harafturat hava fleiri einstaklingar eisini sett bilin til sølu.
Hagtøl:
Nevnast kann, at bilarnir á akfør.fo hava í løtuni ein samlaðan søluprís á yvir 47 milliónir kr. og prísurin liggur úr 5.000 kr. upp til 1.090.000 kr. Elsti bilurin er frá 1998 og nýggjasti frá 2020
Tænastan er ókeypis fyri keypara og seljara, og ætlanin er at menna heimasíðuna leypandi í samráð við brúkaranum.
Mest lisið í farnu viku
Samband
Heygsvegur 8
490 Strendur