Norska stjórnin stuðlar oljuvinnuni
Norska stjórnin stuðlar nú oljuvinnuni við Hjálparpakka. Hesin hjálparpakkin, sum snýr seg um at útseta skattin, fer væntandi at skapa rúm fyri íløgum uppá 100 mia. kr., sum kunnu halda lív í veitingarvinnuni. Tað skrivar Oljan.fo.
Norska stjórnin tekur undir við uppskoti at stuðla hart raktu norsku oljuvinnuni. Hóast ósemja hevur verið um, hvussu hetta skuldi gerast, so tekur ein stórur meiriluti í Stórtinginum undir við at lata oljuvinnuni ein kreppupakka, sum útsetir skattin oljufeløgini rinda til tað almenna í ávísa tíð. Tað vil siga, at oljufeløgini skulu rinda minni í skatti nú og meira seinni.
Ein av grundgevingunum fyri at geva oljuvinnuni eina hjálpandi hond var óttin fyri, at oljufeløgini heilt fara at gevast við at gera íløgur í bæði leiting og útbyggingar, sum kundi fingið álvarsligar fylgjur fyri sera mong arbeiðspláss í veitingarvinnuni.
Roknað verður við, at umleið 100 mia. kr. verða leysgivnar at gera nýggjar íløgur við í oljuvinnuni, tá stórur partur av skattinum hjá vinnuni verður útsettur.
Í semjuni millum politikararnar og vinnulívið verður víst á, at tað kortini verður hildið fram við royndunum at gera framtíðina meira grøna og minka um CO2 útlátið.
Norski forsætisráðharrin, Erna Solberg, hevur verið rættiliga ivasom um, hvussu stuðulin til oljuvinnuna skuldi veitast. Ein møguleiki var eisini at lækka partafelagsskattin hjá oljufeløgnum, men ta loysnina dámdi forsætisráðharrin lítið, tí hon bar ótta fyri, hvat restin av vinnulívinum so fór at krevja. Tí bleiv úrslitið útsetan av skattinum. Og tað skrivar Oljan.fo.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur