Fyrsti heilivágurin móti covid-19 er lættur at fáa til vega
Fyrsti heilivágurin móti koronavirusinum er eftir øllum at døma bæði bíligt og lætt at fáa til vega. Við lágari dosis av steroidviðgerð við evninum, dexamethasone, ber til at hjálpa álvarsliga sjúkum av koronasmittuni, siga bretskir serfrøðingar.
Heilivágurin er úrslitið av mest umfatandi royndini í heiminum í at finna heilivág móti covid-19, burturúr heilivági, sum longu finst.
Við at brúka dexamethasone í lágum dosum, vórðu útlitini fyri at doyggja, ein triðing minni enn annars, fyri tey, sum vóru í respiratori. Fyri tey, sum brúktu súrevnismaskur, vórðu útlini at doyggja minkað við einum fimtaparti.
Serfrøðingarnir siga, at um hetta varð brúkt í Bretlandi beinavegin koronafarsóttin byrjaði, høvdu upp móti 5.000 fólk verið bjargað.
Høvuðskanningarmaðurin, Professor Peter Horby, sigur soleiðis:
- Hetta er einasti heilivágurin higartil, sum er prógvaður at minka um deyðiligheit - og hann minkar munandi. Hetta er stórt gjøgnumbrot, sigur professor Peter Horby.
Hesin heilivágurin kann gerast ein stór hjálp í fátøkrum londum við nógvum koronasmittutilburðum, tí heilivágurin er lættur at fáa fatur á, og kostar lítið.
- Viðgerðin við dexamethasone tekur umleið 10 dagar, og kostar umleið 40 danskar krónur. Fyri sjúklingar sum eru heilt illa fyri, kann tað kosta umleið 300 danskar krónur - og tú fært fatur á heilivágnum um allan heim, sigur professor Martin Landray, sum var høvuðsábyrgdarfólk í granskingini.
Tað skrivar BBC.
Mest lisið í farnu viku
Samband
Heygsvegur 8
490 Strendur