Í grundgevingini stendur, at Janus Rasmussen kannar ein breiðan skarða av ljóðflatum innan fyri electronica á útgávuni.

Umframt at spæla guitar letur hann stóran part av sínum tónleikaheimi taka støði í at skapa síni egnu ljóð elektroniskt.

Janus Rasmussen er eina helvtin av íslendsku-føroysku duo’ini Kiasmos, og hevur seinastu árini spælt lið um lið við Ólafur Arnalds á viðurkendum festivalum um allan heim, og hevur fingið ómetaliga góð ummæli við á vegnum.

Á hesi soloútgávuni, VÍN, fylgir Janus hugskotunum heilt til dyrnar. VÍN er framúr væl framleidd, og er gjørd sum eitt dj-sett við 12 instrumentalløg, sum hoyra saman.

Við hesi útgávuni letur Janus Rasmussen sínar tónlistarligu gávur, teknisku dygdir og spakføra poesi ganga upp í eina hægri eind, stendur at enda um tilnevningina til tónleikavirðisløn Norðurlandaráðsins 2020.

Vinnarin verður funnin 27. oktober til hátíðarhald í Reykjavík. Vinnarin av tónleikavirðislønini fær 350.000 danskar krónur.