Trolið liggur á 400 til 500 metrar dýpi, og tað eru um 1-2 hitastig. Hetta er hiti, sum svartkalvi trívist í. Í frágreiðing frá túrinum verður sagt, at tað var minni at fáa í ár enn undanfarin ár. Miðalveiðan um tíman hini árini, 1995-2020, er 117 kg/t. Í ár var veiðan 65 kilo um tíman. Hetta er helvtina minni enn miðal.

Í summum førum var hitin í sjónum, niðri við botn, væl hægri enn hann plagar at vera. Hetta kann vera ein orsøk til, at so lítið var at fáa av svartkalva, verður sagt av Magnusi Heinasyni.

Í alt vóru 557 nytrupør tikin, av teimum vóru 435 nytrupør frá svartkalva. 109 magar vóru kannaðir, av teimum vóru 91 svartkalvamagar. Høvuðsføðin hjá svartkalva var svartkjaftur.

Tað skrivar Havstovan á heimasíðuni.