Í løtuni eru gott og væl 1,6 milliónir fólk smittað við koronavirusinum í Mið- og Suðuramerika, og meira enn 75.000 eru deyð.

Seinastu tvær til tríggjar vikurnar hava lond sum Meksiko, Peru, Kile og Kolumbia havt ein eksplosivan vøkstur í covid-19-smittuni. Nógvastaðni er talið á deyðum tvífaldað, og smittan breiðir seg við nógvari ferð – ikki bara í størru býunum, men eisini til smærri støð.

Ringast stendur til í Brasil. Bara hetta seinasta samdøgrið eru 1.338 fólk deyð av korona, meðan talið á staðfestum smittaðum í Brasil er hækkað við 37.000, skrivar NRK.

Ein annar epimiðdepil er nú í Meksiko. Her eru umleið 17.500 fólk deyð av korona, og 150.000 eru skrásett við smittuni. Serfrøðingar meta, at veruliga smittutalið liggur um eina millión. Í Meksiko stendur ringast til í býnum, Ciudad Juárez, og í øðrum plássum fram við markinum til USA, skrivar NRK.

Umleið 80 prosent av íbúgvunum í Mið- og Suðuramerika búgva í býum og øðrum tættbygdum økjum, og tað ger tað trupult at steðga smittuni.