Bert Nye Borgerlige, tekur ikki undir við avtaluni. Allir hinir flokkarnir standa aftanfyri avtaluna.

Eitt nú eru donsk reiðarí, sum eiga umleið 200 skip, ið arbeiða á vindmylnuøkinum, sera fegin og síggja fyri sær mong nýggj arbeiðspláss eisini. Henda semja fer at skapa vakstrarmøguleikar.

Fyri at røkka málinum um 70% minking í CO2 útlátinum í 2030 verður mett, at útlátið skal minkast við 19 mió. tonsum. Við nýggju avtaluni ber til at minka tað við 3,4 mió. tonsum, sum er væl meira enn stjórnin legði upp til, sum var 2 mió. tons.

Eisini er frøðin stór hjá andstøðuflokkum og stuðulsflokkum hjá donsku stjórnini, nú tekin eru til eina nýggja skattaskipan við CO2 avgjaldi. Hetta hevur fylt sera nógv í danska orkukjakinum seinastu tíðina.

Avtalan, sum stór undirtøka er fyri, verður nevnd, "Veðurlagsavtala fyri orku og ídnað 2020” og fevnir m.a.um:

Eina nýggja, grønari skattaskipan, sum inniheldur eitt CO2 avgjald.

Danmark fer undir at seta á stovn tvær sonevndar orkuoyggjar innan 2030, sum eru uppá 5 gigawatt tilsamans. Onnur verður nærhendis Bornholm, og hin verður í Norðsjónum. Haraftrat verður stovnsetan av havvindmylnulundini við Hesselø uppá 1 gigawatt framskundað. Hesi íalt 6 gigawattini av havvindi eru tríggjar ferðir so nógv sum núverandi framleiðslan av havvindi í Danmark.

Orkuoyggjarnar skulu seinni kunna bindast í tøkni, sum goymir og umger grøna streymin til grøn brennievni. Hetta slagið av tøkni verður kallað “Power-to-X”.

Avtalan fevnir eisini um stig, sum skulu fáa ídnaðin at gerast meira grønur eitt nú við elektrifisering og orkueffektiviteti og meira biogassi.

Olja og gass skulu úr skipanini. Ístaðin skal grønur fjarhiti brúkast ella elriknar hitapumpur. 

50 mió. krónur skulu brúkast til løðustøðir, men eisini til tungan flutning og ferjur.

Einki verður annars nevnt um komandi útbjóðingina til leiting á danska landgrunninum, nakað, sum stuðulsflokkarnir hjá minnilutastjórnini hava kravt skal vera partur av avtaluni. Stjórnin hevur áður sagt, at hon kannar, hvørjar avleiðingar tað fer at fáa fyri samfelagið og búskapin, um avgerð verður tikin um at steðga útbjóðingini. 

Tað skrivar Oljan.fo