Koltur: Norðuri í Gerði
Ætlanir hava leingi verið, at endurbyggja gomlu húsarekkjuna Norðuri í Gerði. Talan er serliga um Uttar í Stovu og Innar í Búð. Tað var her nýggja tíðin, við útróðri og hjávinnu aftrat landbúnaðinum setti sín dám á bygdina og samfelagið, eisini í Koltri.
Ivasamt er hvør garðurin Norðuri í Gerði er hin eldri. Nøvnini Uttar og Innar kundu bent á at Innar í Búð er eldri garðurin, men staðsetingin Uttar í Stovu er sannlíkt fyrsti garðurin Norðuri í Gerði. Vit vita við vissu at garðurin Heimi í Húsi er hin elsti og tá kann tað verða natúrligt at næsti garðurin, sum vit vita er bygdur Norðuri í Gerði áðrenn 1584, verður nevndur Uttar í Stovu.
Uttar í Stovu
Tá seinastu búfólkini fluttu burtur Uttar í Stovu vóru húsini brúkt til onnur endamál. Seinast í tríatiárunum gjørdi gamli Niclas, pápi kenda bátasmiðin Niclas í Koltri, húsini um til bátasmiðju og tað var her kendi bátasmiðurin Niclas í Koltri lærdi at smíða bátar hjá pápa sínum. Seinni longdi Niclas húsini fyri at kunna byggja størri bátar. Tá Niclas flutti úr Koltri (1961), til Havnar tók hann “bátasmiðjuna” við sær. Síðani hevur Uttar í Stovu verið brúkt til ymisk onnur endamál sum til dømis fjós og rætt.
Innar í Búð
Seinasti maður, sum búði í Norðastu húsunum í Koltri, Innar í Búð varð Marin Niclasen, pápabeiggi bátasmiðin Niclas í Koltri. Tá Martin doyr (1954) varð festi hansara lagt aftrat festinum hjá Niclas í Koltri. Húsini Innar í Búð vóru síðani brúkt til onnur endamál sum til dømis skúla og tað varð ein dag í 1974 skúli hevði verið, at tey gloymdu at strika eldin í komfýrinum. Eldur kom í og húsini brendu í grund.
Hjá Bergstokk
Lítlu reydligu húsini í miðjuni, nevnd hjá Bergstokk, bygdi Joen Jacob Jacobsen (festari 1909-1919), bóndasonur úr Uttar í Stovu, í 1912. Longu í 1919 sigur hann festi frá sær. Bóndurnir í Koltri yvirtaka tá húsini og taka tey niður. Tilfarið deildu teir og brúktu til umvælingar av bygningum kring í oynni.
Embætishúsini
Fyrstu húsini komið verður til Norðuri í Gerði eru í dag embætisbústaður hjá fyristøðumanninum í Koltri. Hesi húsini vóru av fyrstantíð bygd á Búrtoftini Heimi í Húsi í 1898. Stutt eftir vóru tey flutt Norður í Gerðar har tey nú standa, tó nógv broytt. Tað er her kendi bátasmiðurin Niclas í Koltri búði til hann flutti til Havnar 1961. Síðani tá hava tey verið bóndahúsini í Koltri, til festi í Koltri pr. 1. januar 2015 varð niðurlagt og Koltur umlagt frá festi til mentan. Nú Tjóðsavnið í Koltri við egnum fyristøðumanni.
Tað skrivar facebook-vangin Koltur.
Mest lisið í farnu viku
Samband
Heygsvegur 8
490 Strendur