Í dag eru vit í Føroyum á breddanum í arbeiðnum hjá kinesisku myndugleikunum.

Hesa síðstu vikuna, er alt sett á skinnarar, fyri at kinesisku matvørumyndugleikarnir kunnu fremja tað videoeftirlit av føroyskum virkjum, sum teir hava ynskt.

Kinesiski myndugleikin, GACC, hevur valt 2 matvøruvirkir, har tað í dag verður framt videoeftirlit.

Dagurin er skipaður soleiðis, at:

Fyrst verður videofundur millum Heilsufrøðiligu starvsstovuna og GACC – har umstøðurnar rundanum matvøruvirkini og støðan viðvíkjandi koronasmittuni verður viðgjørd og umrødd. Á hesum fundinum luttekur eisini landslæknin
Síðan verður farið á videoeftirlit á fyrsta virkinum, har eftirlitsfólk hjá Heilsufrøðiligu starvsstovuni og virkisumboð greiða frá umvegis videolink til GACC og
Eftir fyrsta virkið, verður sama endurtikið á tí næsta virkinum.

Samskift verður á enskum, og tulkur á donsku sendistovuni í Beijing, umsetir samskiftið.

Á báðum virkjunum og á Heilsufrøðiligu starvsstovuni eru eisini tulkar, soleiðis at samskifti umvegis videolink skal ganga so gott fyri seg sum til ber.

Alt byrjaði kl. 06.30 í morgun, og væntast kann, at samlaða videoeftirlitið kemur at taka einar 4-6 tímar.