Fíggja Bústaðir við 400 milliónum krónum
Bústaðir fáa 400 milliónir krónur at fíggja bústaðarbygging komandi árini, um tað verður tikið undir við uppskotinum til broyting av løgtingslóg um Húsalánsgrunn.
Landsstýriskvinnan í almannamálum, Elsebeth Mercedis Gunnleygsdóttur, hevur sent uppskotið til hoyringar í dag. Uppskotið er partur av bústaðaætlanini hjá Føroya landsstýri.
Landsstýrið ásannar, at bústaðatørvurin er átrokandi.
Bústaðir hevur higartil útvegað 333 leigubústaðir kring landið, og í løtuni eru uml. 170 leigu- og lutabústaðir annaðhvørt í gongd ella ávegis. Við fíggingini uppá 400 milliónir kr. fær felagið møguleika at fara undir fleiri nýggjar verkætlanir.
Samstundis verður ein ráðgeving sett á stovn hjá Bústøðum, sum skal veita borgarum, kommunum, feløgum o.ø. ráðgeving um alternativar byggi- og fíggingarhættir. Endamálið við ráðgevingini er at seta gongd á onnur sløg av bústaðabygging enn sethúsa- og íbúðabygging.
Bústaðaætlanin hjá landsstýrinum fevnir harafturat um eitt alment-privat samstarv um búfelagsskapir til fólk við serligum tørvi.
Fyri at tryggja, at fíggingin sæst aftur kring landið, hevur landsstýrið markað tær 400 mió. kr.:
200 mió. kr. eru markaðar til almannagagnligar verkætlanir, so sum búfelagsskapir ella sambýlir til fólk við serligum tørvi, barnaverndarstovnar ella lestrarbústaðir, sum verða gjørdar eftir avtalu við landsstýriskvinnuna.
100 mió. kr. eru markaðar til verkætlanir uttanfyri miðstaðaøkini, har tað ikki er grundarlag fyri kapping við privat virkandi.
100 mió. kr. eru ómarkaðar, men fara tær til verkætlanir í teimum økjum, har grundarlag er fyri kapping við privat virkandi, skal hetta vera á javnsettum grundarlagi.
Mest lisið í farnu viku
Samband
Heygsvegur 8
490 Strendur