Grønlendska blaðið, Sermitsiaq, skrivar, at í nýggju samgonguavtaluni, sum hevur yvirskriftina “Vøkstur, støðufesti og tryggleiki”, er avtalað, at teir tríggir samgonguflokkarnir, Siumut, Demokraatit og Nunatta Qitornai, skulu kanna møguleikarnar fyri at yvirtaka loftferðsluna, veðurstovnin og tilbúgving frá Danmark.

Ein teirra, sum arbeiðir harðast fyri hesum yvirtøkum í nýggja landsstýrinum, er landsstýrismaðurin í íbúðarviðurskifti og samferðslu, Karl Frederik Danielsen.

Hann heldur, at talan er um tung ábyrgdarøki, sum hava stóran týdning fyri Grønland, og tí skal politiska avgerðin um møguliga yvirtøku verða væl grundað og málini skulu vera væl upplýst.

- Talan er jú ikki um at taka málini heim, men um at byggja upp av nýggjum frá botni av, sigur Karl Frederik Danielsen við Sermitsiaq.

Sermtsiaq skrivar, at grønlendska loftrúmið er eitt torskilt evni við nógvum virknum og altjóða leikarum úr nógvum londum, og tað er eitt øki, sum er tengt at strongum altjóða eftirliti.