Kommunala Arbeiðsgevarafelag fegnast um, at semjan er góðkend
Kommunala Arbeiðsgevarafelagið fegnast um, at landsstýrismaðurin í Fíggjarmálum loksins góðkendi semjuna við Starvsmannafelagið.
- Tað hevur stóran týdning fyri Kommunala Arbeiðsgevarafelagið, at semjan bleiv góðkend, tí talan er um sera prinsipielt mál í mun til bæði kommunala samráðingarrættin og kommunala sjálvræði, sigur nevndin.
Nevndin í felagnum fegnast um, at allar kommunur í landinum hava staðið saman um, og stuðla felagnum í hesum sera týdningarmikla og prinsipiella máli – og ikki minst fegnast tey um, at starvsfólkini, sum starvast hjá kommununum nú verða eins lønt og tey hjá landinum.
Semjan, sum varð undirskrivað tann 3. juni í ár varð gjørd við støði í semjuni millum Starvsmannafelagið og Fíggjarmálaráðið fyri somu starvsfólk í starvi hjá landinum.
Kommunala Arbeiðsgevarafelagið metir góðkenningina at verða eina staðfesting av, at semjan leyk lógarinnar krøv. Kommunala Arbeiðsgevarafelagið hevur vísandi til kommunustýrislógina tryggjað limunum hjá Starvsmannafelagnum framhaldandi samsvar millum lønirnar hjá hesum starvsfólkum - líka mikið um tey eru í starvi hjá landinum ella kommununum, so er teimum tryggjað javnt alment lønarlag.
Nú landsstýrismaðurin hevur góðkent semjuna, og harvið staðfest sjálvstøðuga samráðingarrættin hjá kommununum, verður ikki neyðugt at royna málið í Føroya Rætti.
Nevndin í Kommunala Arbeiðsgevarafelagnum er og hevur alla tíðina verið fullgreið yvir óvissu búskaparligu støðuna í landinum í kjalarvørrinum av korona. Felagið tekur støðuna í størsta álvara - og hevur m.a. gjørt 1 ára sáttmálar grundað á óvissu búskaparligu útlitini. Kommunala Arbeiðsgevarafelagið metir seg eisini hava tillagað samráðingarnar til gongdina í samfelagnum.
Nevndin sigur, at Kommunala Arbeiðsgevarafelagið í hesum sambandi fer at taka samskifti upp við partarnar á arbeiðsmarknaðinum - eisini Fíggjarmálaráðið - um gongdina í búskapinum og ávirkanina hendan hevur á víðari samráðingarnar. Partarnir mugu seta seg saman at umrøða støðuna og skapa eina felags fatan av víðari samráðingunum., sigur nevndin í felagnum.
Samráðingarnar á kommunala arbeiðsmarknaðinum halda fram, tá fundir eru avtalaðir við bæði Maskinmeistarafelagið og Heilsurøktarafelagið í vikuni, sigur Annika Olsen forkvinna, vegna nevndina í Kommunala Arbeiðsgevarafelagnum
Mest lisið í farnu viku
Samband
Heygsvegur 8
490 Strendur