Koronologiskur filmsfestivalur hjá Tjóðpallinum
Tjóðpallurin skipar fyri filmfestivalinum Koronologar í hesum døgum.
Koronologar 2020 eru 19 stuttfilmar, sum eru sprotnir úr koronutíðini á eini tvørlistaligari verksmiðju hjá Tjóðpallinum við 10 rithøvundum, 10 palllistafólkum og 4 fotografum. Filmarnir verða frumsýndir á netinum annanhvønn dag klokkan 20.00. Fyrstu sjey filmarnir eru longu tøkir.
Tá korona brádliga forðaði fyri øllum vanliga virkseminum, valdi Tjóðpallurin í staðin eina øðrvísi verkætlan og setti ymsum listafólkum stevnu við avbjóðingum, sum bróta frá teirra vanliga arbeiðshátti. Rithøvundar, sum eru vanir at skriva stuttsøgur, yrkingar o.a., hava skrivað einarøður til pall, sum leikarar, ið einamest hava framført á palli fyri áskoðarum, hava tulkað og framført framman fyri myndatóli, og myndatakararnir hava loyst spennandi uppgávuna at samantvinna palllist og filmslist.
Stjóri á Tjóðpallinum, Jenny Petersen, sigur, at:
- Endamálið við verkætlanini hevur verið at brúka hesa óvandu støðuna til at flyta okkara egnu mørk og skapa okkurt nýtt og óvæntað, og tí hevur hetta verið ein spennandi og lærurík avbjóðing hjá okkum øllum, sigur Jenny Petersen.
Koronologar 2020 snúgva seg allir, so ella so, tematiskt um korona, og eru sostatt ein løtumynd av, hvørjar hugsanir og hugskot listafólkini hava júst nú. Sostatt er hetta eisini eitt slag av listaligari dokumentatión av einum søguligum tíðarskeiði.
Annfinnur Heinesen, sjónleikari og leikstjóri, sigur:
- Vit vóna, at hyggjararnir fáa eina áhugaverda og fjølbroytta uppliving bæði viðvíkjandi listaliga innihaldinum, og søgunum og støðunum, sum verða lýst, sigur Annfinnur Heinesen, sum eisini er ein av stigtakarunum til verkætlanina.
Koronologar 2020 eru at síggja á heimasíðuni hjá Tjóðpallinum: tjodpallur.fo/koronologar-2020 - umframt á Facebook og YouTube.
Mest lisið í farnu viku
Samband
Heygsvegur 8
490 Strendur