Nevndin í Føroyskum Miðlafólkum heldur fram
Á Aðalfundinum í Føroyskum Miðlafólkum vórðu tey trý, sum stóðu fyri vali hesaferð, vald aftur.
Sambært viðtøkunum skal formaðurin veljast beinleiðis hvørt ár, og Jón Brian Hvidtfeldt varð afturvaldur til sítt fimta formansskeið. Øssur Winthereig, næstformaður, og Uni Arge, skrivari, vórðu somuleiðis afturvaldir fyri eitt tvey ára skeið. Elin Mirjamsdóttir er kassameistari, Beate L. Samuelsen er nevndarlimur, og Jens Kristian Vang er tiltakslimur. Einasta broyting er, at Arnfríð Joensen-Dahl er nýggjur tiltakslimur fyri Jens Hákun Leo.
Aðalfundurin í Føroyskum Miðlafólkum er vanliga í mars, men korona útsetti aðalfundin til leygardagin 4. juli.
Farna skeið hevur verið hendingaríkt í felagnum. Í november varð nýggjur tvey ára sáttmáli undirskrivaður við Føroya Arbeiðsgevarafelag, sum fevnir um privatu fjølmiðlarnar. Eisini skipaði Føroysk Miðlafólk fyri fakligu ráðstevnuni ”Føroyskir fjølmiðlar á vegamóti”, har høvið var at umrøða avbjóðingarnar í føroyska miðlaheiminum og hvørja framtíð miðlarnir ganga ímóti. Tá vóru stuttar framløgur frá journalistum, blaðstjóra, politikarum, umframt at útlendskur fyrilestrahaldari gav eitt yvirlit yvir støðuna í miðlaheiminum í okkara norðurlendsku grannalondum.
Felagið varð bjóðað við á landsfundin hjá Dansk Journalistforbund, ársfundinin hjá Nordisk Journalistforbund í Helsinki, og á ráðstevnuna ”True, false or in between”, sum Norðurlendska Ráðharraráðið skipaði fyri saman við íslendsku stjórnini á Vígdis Finnbogadóttir Institute í Reykjavík í oktober. Føroysk Miðlafólk eru limir í norðurlendska og evropeiska felagsskapinum fyri journalistar.
Føroysk Miðlafólk vil vera eitt felag fyri øll, sum hava sítt yrki í føroyska miðlaheiminum. Felagið er umboðað í Fjølmiðlanevndini, í Miðlastuðulsnevndini, og er partur av rættindafelagsskapinum Fjølrit, umframt at felagið er umboðað í einstøkum grunnum og dómsnevndum av ymsum slag. Felagið er eisini hoyringspartur í málum, sum mugu metast at vera viðkomandi fyri føroyska miðlaheimin.
Mest lisið í farnu viku
Samband
Heygsvegur 8
490 Strendur