12 ára gomul vann ”SprittFisk” filmskappingina
Luftin titraði, tá ið luttakararnir í filmskappingini ”SprittFisk” stroymdu allar 19 filmarnar, sum vóru við í kappingini.
12 ára gamla Vigga Hansen vann kappingina.
Evnið var Korona, og snávingarsteinurin var, at hugtakið Korona ella Covid-19 ikki skuldi nevnast i filminum, sum skuldi verða 3-7 minuttir til longdar. Dómsnevndin legði dent á góðu og persónligu søguna.
60 luttakarar úr øllum Føroyum høvdu teknað seg til filmskappingina. Miðað varð ímóti at fáa ein fjølbroyttan luttakaraskara, og má hetta sigast at hava eydnast til fulnar. Yngsti luttakari var 6 ár, og elsti luttakari var 76 ár. Ongi krøv vóru til filmsroyndir, filmsútgerð ella filmssjangru.
Eftir sýningarnar avdúkaði Hanna Jensen vinnaran. Tey trý, ið mannaðu dómsnevndina, vóru Heini i Skorini, Teitur Lassen og Hanna Jensen.
Vigga Hansen besta filmin
Besta filmin átti 12 ára gamla Havnagentan Vigga Hansen. Filmurin uttan heiti er ein filmaður heimspekiligur dagbókatekstur frá koronu-tíðini; heilt neyvt fevnir hann um dagin, tá ið kunngjørt varð, at skúlar, fritiðarskúlar og dagstovnar stongdu og til samanumtøkuna 18. mai. Hetta var dagurin, tá ið skúlabørnini í hennara aldri fóru í skúla aftur.
Um filmin segði dómsnevndin ma. soleiðis:
”Útsagnirnar eru kveikjandi og elva til kjak og hugsan. Filmurin setur spurningar um, hvussu mann skal liva, tá mann hevur tað á ein ávísan hátt, og hann leggur seg væl í dagbókasjangruna sum ein føroysk Anna Frank, men í filmsmiðli og við avbyrgingini í felag.”
Sí vinnandi filmin HER. https://www.youtube.com/watch?v=YRW-jkOKJF0&feature=youtu.be
Mest lisið í farnu viku
Samband
Heygsvegur 8
490 Strendur