Sambært Kringvarpinum eru higartil 25 tilburðir av koronu staðfestir í dag, men talið kann koma uppá 30, sigur Lars Fodgaard Møller, landslækni, við útvarpið. Tilsamans 1.500-1.600 fólk vórðu kannað í gjár.

Umleið 300 kanningar verða greinaðar í løtuni. Landslæknin skal síðani ringja til teirra, sum hava fingið staðfest smittuna.

Heitt verður tí á fólk um at vera serliga varin, til øll kanningarúrslit eru almannakunngjørd. Tølini verða kunngjørd skjótast gjørligt á korona.fo og á heimasíðuni hjá Heilsumálaráðnum.

Um tú ikki hevur hoyrt frá Landslæknanum, tá tølini verða kunngjørd, er úrslitið av kanningini negativt.