Stovnar undir almannaverkinum, ellis- og røktarheim, og sjúkrahúsini hava avmarkað vitjunarmøguleikarnar, og Landsstýrið hevur gjørt av at skúlagongdin á hægru lærustovninum, sum skuldu byrja aftur hesa vikuna, fyribils er útsett til mánadagin 17. august.

Í hesum sambandi hevur Tvøroyrar kommuna gjørt av, at barnagarðurin Mýrifípan og frítíðarskúlin verða stongdir frá í dag, í fyribils eina viku og eftir ætlan fyrst lata upp aftur mánadagin 17. august.

Fyri at tryggja, at týðandi lyklastørv innan heilsuverkið, almannaverkið, og røkt av alneyðugum tænastum av undirstøðukervinum framhaldandi eru virkin, er neyðugt, at starvsfólk, sum røkja slíkar uppgávur sleppa til arbeiðis. 

Tí hevur leiðslan í Tvøroyrar kommunu avgjørt at stovna eitt undantaks bráðfeingis ansingartilboð, til slík starvsfólk, sum ikki uppá nakran annan hátt hava aðrar møguleikar at finna ansing til síni børn, og sum hoyra til henda bólkin.

Støðan broytist skjótt, og tí er tað av stórum týdningi at vit øll fylgja støðuni tætt og eftirmeta so hvørt støðan broytist. Heitt verður á allar borgarar um at fylgja við á heimasíðuni hjá Tvøroyrar kommunu og á sosialu miðlunum hjá kommununi, har øll kunning verður løgd so hvørt sum støðan broytist.

Upplýsast skal eisini, at ongi tekin eru um korona smittu á dagstovnaøkinum á Tvøroyri, men henda áheitanin er fyri at fyribyrgja og minka um vandan fyri útbreiðslu av koronasmittu.