Norðmenn spentir uppá laksarutu hjá Smyril Line
Komandi tíðina fær Mið-Noreg tvær beinleiðis sjóvegis farleiðir til Hollands. Tað ger tað møguligt at royna sjóvegis laksaflutning úr Mið-Noregi á evropiska meginlandið í stórum stíli, og norðmenn eru spentir uppá nýggju farleiðina. Aðra farleiðina stendur Smyril Line fyri.
Í morgin, hósdagin, fer farmaskipið, Akranes hjá Smyril Line fyrsta túrin frá Kråkøya í Rørvik í Noregi, til Hitra, og haðani til Hollands við ymsum - millum øðrum feskum laksi. Og 3. september byrjar eitt annað reiðarí, North Sea Container Line, eina aðra vikuliga farleið við feskum laksi í bingjum til Rotterdam.
Skipsrevyen.no skrivar, at nýggju farleiðirnar eru úrslitið av tí, tey rópa Kysthavnalliansen ella Strandahavnasamstarvið, sum hevur samstarvað við laksafyritøkurnar í økinum, Lerøy og SalMar. Samstarvið byrjaði í 2019.
Endamálið var – saman við øðrum vøruútflytarum í økinum, at fáa eina alternativa og kanska betri farleið á evropiska marknaðin. Eina farleið, sum kundi kappast í prísi við til dømis at flyta feskan laks á evropisku vegunum.
- Vit hava alla grund at takka vørueigarunum, sum virknir arbeiða við at flyta farmin frá vegunum til sjóvegis flutning. Tað prógvar millum annað eina grøna hugburðs-broyting, sigur Ann Iren Holm Rise, ætlanarleiðari í Strandasamstarvinum.
- Tað er jaligt, at tvey reiðarí gjøgnum Shortsea-ætlanina nú byrja sigling niður á evropiska meginlandið. Vit eru spent at royna sjóvegis farleiðina av feskum fiski frá Mið-Noreg – í fyrsta umfari uppá styttri sikt, men vónandi eisini í longdini, sigur Espen Andersen, sum leigir logistikkin fyri Lerøy Seafood.
Og tað skrivar Skipsrevyen.no.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur