Avreiðingarvirðið er minkað 40 %

-Hóast vit hava fiskað 20 tons meira av toski í ár enn í fjør, so er avreiðingarvirðið 40% minni í ár enn síðsta ár, vegna koronu. Í krónum eru vit 300 túsund aftanfyri avreiðingarvirðið í fjør, hóast áðurnevndu framgongdina í nøgd, so tað er ikki hugaligt í løtuni at vera fiskimaður.- Tað sigur 55 ára gamli útróðrarmaðurin, Ujunnguaq Heinrich, í Nuuk.

-Eg havi ein 36 fót Fåborg deksbát, og vit royna mest við botngørnum eftir toski. Vit royna eisini nakað við línu; men vit fiska mest við gørnum, og sum oftast eru vit tríggir við bátinum.
Vit fiska mest tosk, men prísurin er alt ov lágur. Kiloprísurin er 7 krónur fyri avhøvdaðan tosk, og 5,75 krónur fyri tosk við høvdi. So tað sigur seg sjálvt, at tað er lítið hugaligt í løtuni, tí útreiðslurnar eru tær somu sum, áðrenn koronuprísfallið,- sigur hann.

-Eg havi verið sjómaður í 42 ár og havt mín egna bát síðstu 10 árini. Mær dámar væl útróðrarlívið, men eg skal helst kunna liva av tí, ella gevur tað ikki meining,- sigur Ujunnguaq Heinrich.
Sjómanstrúboðarin hitti Ujunnguaq á bryggjuni í Nuuk, tá teir vóru í holt við at landa 2700 kilo eftir trimum døgum.

Ujunnguaq og sjófólkunum annars verður ynskt Guds signing og varðveitslu.

Tað skrivar Føroyska Sjómansmissiónin á facebook. Mynd Tj-myndir. Fleir myndir HER