Longu nú er greitt, at fleiri borgarstjórar í Eysturoynni ikki stilla upp aftur. Í februar í 2019 boðaði Jóhannus Danielsen, borgarstjóri í Nes kommunu, frá, at hann stillar ikki uppaftur til kommunuvalið í heyst. Jóhannus Danielsen hevur havt sæti í kommunustýrinum í Nes kommunu síðan 2008 og hevur síðani 2012 sitið sum borgarstjóri. Framanundan hevði Johan Christiansen, borgarstjóri í Eysturkommunu, boðað frá, at hann ikki stillar upp aftur til kommunuvalið í november.

Vit hava eisini tosað við borgarstjóran á Eiði, Jógvan í Skorini, sum síðan 2013 hevur verið borgarstjórði í Eiðis kommunu. Hann fæst ikki at siga, hvørt hann stillar upp ella ikki. Eg havi ikki tikið nakra endaliga avgerð, so tað svarið má bíða nakað enn, sigur Jógvan í Skorini, tá vit enn eina ferð ringdu til hann fyrr í dag fyri at fregnast.

Í Fuglafjarðar kommunu er Sonni á Horni borgarstjóri. Hann kom í kommunustýrið í 2008. Síðan 2012 hevur hann sitið sum borgarstjóri. "Hetta er eitt spennandi starv, eg havi ivast, men nú tað nærkast, so havi eg avgjørt at stilla upp, um boð vera eftir mær á onkrum lista", sigur Sonni á Horni.

Í Sjóvar kommunu er Arthur Johansen, borgarstjóri. Hann var fyrstu ferð valdur í kommunustýrið í 2001 og sat sum vanligur kommunustýrislimur til 2004. Eina tíð var hann ikki inni, men síðan 2009 hevur hann sitið sum borgarstjóri. "Um eg stilli upp? Tú fært fært meg ikki at siga, um eg stilli upp aftur, tey kortini halda vit tætt at kroppinum", sigur Arthur, tá vit ringdu í gjár.

Í Runavíkar kommunu er Tórbjørn Jacobsen, borgarstjóri. Hann hevur verið borgarstjóri í Runavíkar kommunu síðan januar 2016. Hann tók tá við sessinum, tá Magnus Rasmussen fór í farloyvi úr borgarstjórastarvinum fram til 1. januar 2016.  Tann 1. januar í 2016 var hann aftur valdu til borgarstjóra í Runavíkar kommunu, sostatt hevur hann sitið í fimm ár, tá ið hendan setan er av.

Tá vit spyrja Tobba, um hann stillar upp til kommunuvalið í heyst ella ikki, er svarið greitt: "Tann greiða boðskapin almannakunngjørdi eg á jólaveitslunu hjá Runavíkar kommunu, seinast. Har fekk fjøldin at vita, at eg ætlaði at taka eitt tørn aftrat í kommununi, so ja, er svarið".

Sostatt er greitt, at Jóhannus Danielsen, borgarstjóri í Nes kommunu, Johan Christiansen, borgarstjóri í Eysturkommunu leggja frá sær. Meira ógreitt er við borgarstjóranum á Eiði, Jógvan í Skorini og við borgarstjóranum í Sjóvar kommunu. Greitt er, at borgarstjórin í Runavíkar kommunu stillar upp aftur og at Sonni á Horni, borgarstjóri í Fuglafjarðar kommunu, stillar upp aftur, um boð verða eftir honum”