Í dag áttu vit eftir røttum at sett Mentanardagar 2020
Heimurin hevði verið gandaður og vit høvdu fingið sum mest úr løtuni. Eitt flirr í Miðstaðarlundini. Felagssang í regnskjólagøtuni, ein “svingom” í bátasavninum og ein duss í Kafé Riberhus. Kassabilar, regnskjól, samkomur, kommuna, vinna og ítróttur.
Í dag ( í gjár ) áttu vit eftir røttum at sett Mentanardagar 2020. Um alt var sum vanligt, so høvdu vit tuskað, tivað, og peikað. Lisið Windy, YR og DMI og kaga upp í himmalin, tí hvat sigur hann um veðrið? Fer tað at hátta sær? Og hvat siga teir kønu?
Vit høvdu havt ein høgan puls og svøvmangul. Norðurlensk tónlistafólk vildu verið komin, verið húsaði, boðin vælkomin og byrjaði at venja. Føroysk myndlistafólk høvdu høvdu hongt teirra verk upp. Føroyskt hándverk hevði havt sítt rúm. Matlist sítt rúm.
Føroyskar rávørur, tiknar upp, skornar til flak ella lagdar í kryddlaka. Hjallar og matkovar verið tømdir. Neyst gjørd um til matstovur. Bátar til pallar. Vaksin til børn og møði til gleði.
Saman, høvdu vit arbeitt ímóti felags máli. Bygt brýr og traðka í spor hjá hvørjum øðrum. Vit høvdu lurta, hugt og sæð, sungið og spælt. Verið saman um framførðslur ella verið við í framførðslum. Vit høvdu longt dagin og stytt náttina, nettupp tí vit vildu verið saman.
Heimurin hevði verið gandaður og vit høvdu fingið sum mest úr løtuni. Eitt flirr í Miðstaðarlundini. Felagssang í regnskjólagøtuni, ein “svingom” í bátasavninum og ein duss í Kafé Riberhus. Kassabilar, regnskjól, samkomur, kommuna, vinna og ítróttur. Ein pottur ein heimur.
Hetta verður alt av ongum vegna koronu. Men í hjørtum okkara kunnu vit lata sum um. Tað er jú í møtinum við onnur menniskju at vit sjálvi verða menniskju.
Tí bjóða vit øllum at vera hjartaliga vælkomin til ókeypis uttandura konsert við Kyrjastein, sjálvsagt í frástøðu, kl 20 leygarkvøldið 5. sept.
sí meira á heimasíðuni hjá Mentanarhúsinum www.mh.fo
Tað skrivar Mentanardeildin Fuglafjarðar kommuna
Mest lisið í farnu viku
Samband
Heygsvegur 8
490 Strendur