PETER MAIDEN - Internationalur OM-leiðari í 13 ár
Týsdagin 14 juli komu deyðsboðini av einum av oddamonnunum innan OM (Operation Mobilisation) Peter Maiden. Tí eru tað nógvir føroyingar, bæði í Føroyum og í Danmark, sum kenna hann og koma at kenna saknin eftir hann. Hann og konan vitjaðu í Føroyum í 2012.
Peter Maiden var Onglendingur. Føddur í norðurenska býnum Carlisle í apríl 1948, har hann eisini vaks upp. Hann var so statt bert 72 ára gamal, nú hann legði frá sær.
Hann var sonur ein kendan prædikumann í Onglandi, og tað er júst prædikugerningurin, sum hevur verið lívsluturin hjá Peter Maiden, og tá serliga innan OM.
Tá grundleggjarin av OM, George Verwer, legði frá sær sum altjóða leiðari hjá OM í 2003, tá var tað Peter Maiden, ið tók yvir sum altjóða leiðari hjá OM. Hetta starvið røkti hann í 10 ár, tá hann í 2013
fór frá sum altjóða leiðari. Tað var sum altjóða leiðari innan OM, at Peter Maiden vitjaði í Føroyum í november í 2012. Tey eru mong, sum minnast hann frá hesi vitjan, tá hann hevði fleiri seminar í hølunum hjá Dansifrøði í Gundadali.
VÆL ÍLATIN
Peter Maiden var væl ílatin til uppgávuna sum altjóða leiðari frá 2003 til 2013, tí longu í 1974 gjørdist hann ovasti OM leiðari í Stóra Bretlandi, sum hann røkti í 11 ár til 1985, tá hann gjørdist altjóða varaleiðari innan OM, sum hann hevði í 17 ár inntil 2003, tá hann tók uppgávuna eftir George Verwer og gjørdist ovasti altjóða leiðari tey næstu 10 árini. Í 2013 handaði hann altjóða leiðarapostin til Lawrence Tong úr Singapore. Peter Maiden hevur so statt havt ábyrgdarfull og krevjandi leiðarastørv innan OM (Operation Mobilisation) í 38 ár.
Hesi seinastu árini hevur hann tó ikki ligið á latu síðuni, tí hann hevur ferðast nógv í prædikugerninginum innan OM høpi, men seinasta árið hevur hann verið merktur av sjúku.
At Peter Maiden ikki er meir millum okkara kenst sum ein tungur saknur og missur í tí stóra skaranum av fólki, sum eru við OM um allan heim. Ikki minst er tað George Verwer sjálvur, sum kennir stóran sakn. George skrivar í einum minnisriti soleiðis: “Tíðina hann var altjóða varaleiðari í OM saman við mær, tá var tað hann, sum bar størra partin av byrðuni. Hann tók trupuleikarnar, meðan eg tók signingarnar!”
Meðan Peter Maiden vitjaði í Føroyum hevði kristiliga sjónvarpsstøðin IKTUS samrøðu við hann, sum eisini varð send um tað mundi fyri 8 árum síðani. Í samrøðuni hevur hann eina breiða biografiska lýsing av einum spennandi lívi. Seinast í samrøðuni hevur hann eina persónliga heilsan til føroyska fólkið. Sjónvarpssamrøðan við Peter Maiden var endursend í Iktus fyri einum mánaða síðani, og hon er júst nú løgd út á Youtube og kann hoyrast har. Tú kanst leita inni á Youtube við at skriva: IKTUS, Peter Maiden.
Peter Maiden fór til gravar mánadagin 20. juli. Orsaka korona var tað ein lítil familjujarðarferð, har George Verwer hevði minnisrøðuna. Minnisgudstænasta verður hildin seinni í ár.
Peter Maiden skrivaði fleiri bøkur og seinasta bókin er farin til prentingar og kemur seinni í ár. Eftir hann situr konan Win og teirra trý børn og 10 abbabørn. Peter og Win búðu í býnum Kendal í Norður Onglandi.
Kristiliga Tíðindatænastan
v/poul jóhan djurhuus
gjaranes@gmail.com
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur