Eftir 28 ár í kommunupolitikki hevur Sigurð S. Simonsen valt ikki at stilla uppaftur til kommunuvalið 10. nov. í ár. Sigurð er føddur 1942, og verður harvið 79 næstu ferð lagkøkan kemur á borðið á Ennivegi 25.

Sigurð stillaði fyrstu ferð upp til kommunuvalið í 1992, og varð valdur. Síðani tá hevur hann verið valdur hvørja ferð, og hevur sostatt sitið í Fuglafjarðar býráði í samfull 28 ár. Hann var borgarstjóri í 12 ár, nevnliga frá 1. januar 2001 til 31. desember í 2012. Út frá hesum fakta sæst, at Sigurð er ein av royndastu kommunupolitikarunum í landinum yvirhøvur.

Sigurð er ein ógvuliga vitandi og ikki minni vitugur maður. Hann hevur stóran áhuga fyri øllum lívsins viðurskiftum, og hetta hevur eisini veruliga endurspeglað seg í hansara tíð sum ”fólksins tænari”. Men tað er ikki at taka seg aftur í, at Sigurð’sa heilt serliga styrki hevur ligið í stóru vitan hansara og áhuga í vinnuni. Og tað er heldur ongin loyna, at hansara visiónir fyri vinnulívinum í Fuglafirði á so mangan hátt eru førdar út í lívið, soleiðis at vit í Fuglafirði í dag eru á allarovastu rók í Føroyum, tá tað ræður um vinnulív og inntøkur frá vinnuni.

Tað verður saknur í Sigurði í býráðnum. Saknur bæði í hansara menniskjaligu eginleikum, men eisini hansara stóru vitan í kommunalum viðurskiftum.

Vit á lista B ynskja at takka Sigurði, og ynskja honum somuleiðis blíðan byrð og Guds signing framyvir.