Í fleiri ár varð heitt á avvarðandi myndugleikar, m.a. Búnaðarstovuna, um at rudda upp í Víkarbyrgi. Í nógv ár høvdu leivdir frá einari smoltstøð, sum var í Víkarbyrgi, givið fólki høvubrýggj. 

Borgarstjórin í Sumbiar kommunu (sum eisini fevnir Víkarbyrgi) kontaktaði fleiri ferðir Búnaðarstovuna, landsstýrisfólk, fulltrúar og onnur embætisfólk um hjálp til at burturbeina leivdirnar, tí kommunan megnaði tað ikki sjálv.  

Fyrr í ár tóku fólk og fyrtøkur seg saman at beina alt burtur í Víkarbyrgi. Tað skuldi peningur og nógv fólk til eitt so stórt átak. Alifyrtøkan Bakkafrost kom bæði við peningi og starvsfólkum. Umhvørvis- og vinnumálaráðið setti eisini pening av til átakið. 

Sumbiar kommuna hevur nú gjørt upp, hvussu nógv uppruddingin kostaði. 

Á heimasíðuni siga tey soleiðis um kostanaðin:

Kunning um kostnaðin fyri uppruddingina í Víkarbyrgi

Útreiðslur:

Løn til ein arbeiðsmann 53.754,14kr, eftirløn til sama 4.799,48 kr,
RM-bilar koyring tilfar 21.450 kr uttan MVG.
Burturbeining til IRF 25.090 kr uttan MVG.
Keypt amboð 5.764,48 kr uttan MVG.
Umvæling 3.052,42 kr uttan MVG.
MVG 3.459,80 kr
JCB maskina 24.000 kr.
MAN lastbilur 16.500 kr

Ein arbeiðsmaður ca. 50 tímar, 0 kr.

Tó mangla eitt sindur av rørum, at burturbeina til IRF, og ca. 4 til 5 less av mold, at koyrast til Víkarbyrgi

Samlaði kostnaður er 157.870,32 kr.

Stuðul:  Bakkafrost goldið 100.000kr, Umhvørvis- og vinnumálaráðið hevur goldið 75.000kr.