At taka æruna, heldur enn ábyrgdina!
Æran skal ikki takast, men fáast sum ein viðurkenning fyri gott avrik. Veljarin er ikki blindur. Tit síggja og vita líka væl sum eg, hvat er gjørt, hvat er ávegis og hvat liggur í kortinum.
At taka æruna, heldur enn ábyrgdina!
Eg las hendan tekstin ein dagin herfyri. Fann hann ikki aftur, men hetta bleiv við at mala í høvdinum. Bleiv lagt út sum ein spyrjandi status hjá einum facebookvini. Av tí at eg ikki minnist, hvør viðkomandi var, og hvørki dámdi ella viðmerkti uppslagið, fann eg tað ikki aftur, og eg kundi tískil ikki fylgja viðmerkinginum til dagføringina.
Øll eru vit ymisk, og øll hava vit egnu áskoðan á tað mesta - eisini hetta um at taka æruna. Sjálv síggi eg nógv betur tað, ið liggur eftir. Tað, vit ikki náddu, enn tað, sum er framt. Bjóðar ein seg fram at stýra býnum, við pengunum hjá fólkinum, hevur ein ábyrgd at stýra væl. Og er tað eisini skylda hjá teimum fólkavaldu at raðfesta, har tørvurin er størstur. Alt tað, sum enn liggur á láni, einamest viðlíkahald og at fáa verkætlanir heilt lidnar, fari eg at uppraðfesta.
Eg taki fegin ábyrgd av øllum tí, vit ikki náddu, og øllum tí, vit ikki raðfestu hesi seinastu fýra árini. Veljarin er ikki blindur. Tit síggja og vita líka væl sum eg, hvat er gjørt, hvat er ávegis og hvat liggur í kortinum. Av somu orsøk eri eg til dystin fús. Eg kenni tørvin og vil fremja teir manglar, ið eru.
Ein størri JAVNVÁG skal vera ímillum íløgur og viðlíkahald. Æran skal ikki takast, men fáast sum ein viðurkenning fyri gott avrik.
Signhild Vilhelmsdóttir Johannesen
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur