Ísraelska 2-flokkastjórnin verjir Netanyahu móti rættarmálinum
Samgongan, sum teir báðir stóru flokkarnir í ísraelska Knesset, høgravendi Likud við Bibi Netanyahu á odda, og miðflokkurin Blái og Hvíti, sum Benny Gantz leiðir, hongur saman enn, hóast veljararnir væntaðu skjótt skrædl.
Tað var um páskatíð, at tað eftir 3 tjóðartingsval innan eitt ár eydnaðist at fáa hesar annars ósamdu flokkar og menn at skipa eindarstjórnina í Jerusalem.
Ótaldar royndir at skipa stjórn hava bylgjað aftur í fram í mánaðir.
Serliga eru Bláu Hvítu veljararnir misnøgdir, tí 3 ferðir hevur Gantz í valstríði lovað sínum veljarum, at teirra miðflokkur fór ikki í samgongu við Likud, meðan Netanyahu var leiðari. Men tá ein ikki fær tann, ein elskar, má ein ....
Sum eitt damocles-svørð yvir høvdinum á Likud-leiðaranum hevur leingi hingið eitt rættarmál fyri mutur. Ta løtu, Netanyahu ikki longur hevur ábyrgd sum stjórnarleiðari, fellur øksin, og hann missir sítt órin og noyðist í rættin.
Um hald er í hesum skuldsetingum, vita vit ikki fyri vist, fyrrenn rættarmálið er lokið, og dómur feldur. Men ein partur av málinum snýr seg um, at Bibi og konan hava verið so fornem at keypa lidnan mat úr býnum, hóast tey sum forsætisráðharrahjún hava alment løntan kokk heima í køkinum.
Men tað er fyrr komið fyri, at ísraelskir topp-politikarar eru dømdir fyri slíkt.
Nýggja stjórnin fyri tjóðarsemju av 2 javnstórum flokkum hevur ikki færri enn 36 ráðharrar, sum flokkarnir hava býtt so kristiliga sínámillum.
Tað spennandi er, at floksformenninir hava samst um at býta tíðina sum forsætisráðharrar líka javnt ímillum sín. Netanyahu hevur tikið fyrstu 18 mánaðirnar sum stjórnarleiðari.
Tá eitt gott ár er farið, t.e. næsta heyst, eigur Benny Gantz fyrsta pláss í samgonguni og stjórnini, og Netanyahu má víkja sítt sæti. Kanska verður tá høvi hjá ísraelsku rættarskipanini at koyra Netanyahu í kvørnina.
Hin vegin vita vit, at Likud-leiðarin er listilærdur politiskur telvari og krútsterkur strategur. Nøkur av onkrum hava snevilin av, at Bibi roynir at keypa sær tíð hetta komandi árið. (‘Kommer tid, kommer råd’, plaga danir at siga). Kanska fær hann okkurt høvi til at sleppa av krókinum og at útskriva val áðrenn tíð.
Mest lisið í farnu viku
Samband
Heygsvegur 8
490 Strendur