Torleif Johannesen, sum umboðar Sjómansmissiónina og Jóan Petur Johannesen, sum umboðar OM-Føroyar vóru báðir til reiðar at hava eitt prát við Kristiligu Tíðindasendingina. Spurdir hvat teir gjørdu á eini fiskarímessu svaraði Torleif: “Vit selja einki.....evangeliið er so stórt og dýrt, at eingin klárar at keypa tað, tí fæst tað bara fyri einki......vit ynskja at vísa andlit og kunna um arbeiði hjá Sjómansmissiónini!”

Jóan Petur Johannesen tók soleiðis til, tá hann varð spurdur hví OM er á fiskarímessu: “Vit ynskja at vísa andlit, og hetta er eitt gott høvi at heilsa upp á fólk.....flestu føroyingar kenna gomlu Norrønu, og nú fáa teir kunnleika um hvat Norrøna verður brúkt til í dag!”

Jóan Petur sigur víðari, at nógv fólk hevur vitjað básin, bæði føroyingar og útlendingar, sum hava verið áhugaðir at hoyra um altjóða arbeiði hjá OM og um arbeiði hjá gomlu Norrønu, sum í dag er missiónskip og eitur Logos Hope.

Torleif Johannesen sigur somuleiðis, at nógv fólk hava steðgað á og víst stóran áhuga fyri arbeiðinum hjá Føroysku Sjómansmissónini.

Tey, sum vitjaðu básin, sum er ein felagsbásur hjá Føroysku Sjómansmissiónini og OM-Føroyar, høvdu møguleika at fáa eitt kunnandi prát um ávíkavist Føroysku Sjómansmissiónina og um arbeiði hjá OM-Føroyar, og eisini at seta seg inn í myndatilfari, sum var tøkt á básinum, og kundu eisini taka við sær kunningartilfar, sum varð framvega til høvið.

Fleiri fyrilestrar vóru á messuni, og millum fyrilestrarhaldararnar var Myles Toews úr USA, sum fleiri ferðir hevur vitjað í Føroyum í OM-høpi. Hann kom til Føroyar fyri at vera við á felagsbásinum hjá OM. Leiðslan á fiskarímessuni bjóðaði honum at hava fyrilestur um arbeiðið hjá Operation Mobilisation, stytt OM. Í fyrilestrinium greiddi hann frá arbeiðinum hjá missiónskipinum Logos Hope, sum er gamla Norrøna, og hvussu fólk kunnu vera við til at veita oljustuðul til Logos Hope. Hetta er fyrstu ferð, at OM er við á eini messu sum hesari.

Torleif Johannesen sigur, at Føroyska Sjómansmissiónin hevur einaferð áður fyri nógvum árum síðani luttikið á eini tílíkari messu. Teir siga báðir, at tað er ikki óhugsandi at luttøkan verður endurtikin á eini komandi fiskarímessu – tað skuldi væl saktans ikki verið so langt við síðuna av, tí lærisveinarnir vórðu kallaðir menniskjafiskimenn!

(Kelda: Bandaðar samrøður við Torleif Johannesen og Jóan Petur Johannesen á fiskarímessu í Klaksvík 11.05.2017)