B36 og Róaldur Jakobsen úr ógjørligari støðu í steypafinaluna
Róaldur Jakobsen var gylti spælarin, tá B36, sum leingi spældi við níggju ímóti 11, vann á arvafíggindanum úr HB eftir longda leiktíð og tryggjaði sær plássið í steypafinaluni.
Gundadalur hevur kanska ongantíð sæð eina grannauppgerð, sum hana í dag, tá B36 kom aftur úr mestsum ógjørligari støðu, og vann 3-2 á HB og tryggjaði sær plássið í steypafinaluni, har árstalsfelagið skal spæla ímóti NSÍ.
Tað sá annars sera svart út hjá B36, tá HB tíðliga í longdu leiktíðini legði seg framum 2-1 við máli frá Bartali Wardum. Tá vóru Patrik Johannesen og Eli Falkvard Nielsen longu vístir av vølli, og B36 hevði mist 1-0 leiðsluna, sum Erlendur Magnusson hevði givið teimum í 51. minutti.
B36 gav kortini ikki skarvin yvir, og teimum tørvaði bert at javna, fyri aftur at vera omaná í samlaða roknistykkinum. Tað var eisini júst tað sum hendi, tá árstalsfelagið fekk fríspark uttanfyri sekstanmeturin. Róaldur Jakobsen gjørdi, sum hann plagar, og setti bóltin í netið aftanfyri Teit Matras Gestsson.
HB gjørdi alt fyri at fáa avgerandi málið, men eitt beinleiðis fríspark á yvirleggjaran frá Adrian Justinussen var tað nærmasta teir komu. Í desperatión sendu teir málverjan fram til ein deyðbólt, men Róaldur Jakobsen fekk fatur á bóltinum, skjeyt hann í tóma HB-málið frá egnari hálvu og hvíta helvtin av Gundadali kundi fegnast um ein ótrúligan og ósannlíkan sigur.
HB-B36 2-3 (eftir longda leiktíð)
0-1: Erlendur Magnusson 51.
1-1: Bartal Wardum 83.
2-1: Bartal Wardum 91.
2-2: Róaldur Jakobsen 97.
3-2: Róaldur Jakobsen 119.
Mest lisið í farnu viku
Samband
Heygsvegur 8
490 Strendur