Nógv fólk hava hoyfepur, men tað eru ikki øll, sum vita tað. Viðhvørt verða sjúkueyðkennini av ávikavist hoyfepuri og krími blandað saman.

Sjúkueyðkennini av hoyfepuri kunnu vera ymisk frá persóni til persón, eisini hvussu nógv tað órógvar tann einstaka, og í hvussu langa tíð eyðkennini plága hin einstaka. Hjá nógvum hevur hoyfepur eina keðiliga ávirkan á tað ”sosiala”, skúlan og arbeiðslívið. Sleppast kann undan hesum, tí tey flestu, ið hava hoyfepur, hava møguleika fyri at liva eitt vanligt lív uttan teir stóru trupulleikarnar - við  tí røttu viðgerðini og vitanini um sjúkuna.

Hvat er hoyfepur?

Hoyfebur, sum eisini verður nevndur allergisk rhinitis, er tá ið ein er ovurviðkvæmur fyri eitt nú pollen (blómusáð) og kann tí verða treyta av árstíðuni. Tað eru nógv ymisk sløg av pollen, men í Føroyum er tað gras-pollen, sum er orsøk til hoyfepur hjá fólki.   

Hoyfebur kann eisini standast av innandura andelvi sum t.d. djórahárum, dustmottum ella blámusoppi og kann tí geva sjúkueyðkenni alt árið.

Ofta kann, sum sagt, vera torført at kenna mun á, nær talan er um hoyfepur ella krím. 

Sjúkueyðkenni av hoyfepuri eru:

·        Eygu: Reyð, skriði, rennur úr teimum, eru viðkvæmari fyri ljósi, eygnalokini og slímhinnan í eygunum hovna.

·        Nøs: Tipt, nasaútflotið  klárt, skriði, nýsur ofta.

Er talan um krím, er nasaútflotið tjúkt, óklárt, gult og onkuntíð febur. Viðkomandi nýsur bert av og á, og eyðkennini vara sjáldan meira enn 1 viku.

Góð ráð alt eftir, hvørjum tú er ovurviðkvom/ovurviðkvæmur fyri

-Finn ta røttu heilivágsviðgerðina til júst tín
-Lat onkran annan sláa grasvøllin
-Sov ikki við opnum vindeyga
-Lat vindeygu aftur, tá nógv grassáð er í luftini
-Nýt sólbrillur, tá tú er úti
-Vaska ella skola hárið, áðrenn tú fer í song fyri at fáa pollen úr hárinum
-Hav vindeygu aftur, meðan koyrt verður í bili
-Heingj ikki vaskiklæðini út á snórin, tá ið nógv grassáð er í luftini
-Innrætta bústaðin væl (eingi teppir ella annað, ið elvir til dust)
-Dustsúgvið ofta og ger javnan reint
-Ongi pelsdjór
-Skola eyguni og nøsina í isotoniskum saltvatni, um tú hevur verið, har pollen er
-Sjúkueyðkennini kunnu gerast verri, um tú eitt nú er, har tubbaksroykur er, os frá stearinljósi, parfuma, roykur frá báli - avmarka tí hetta  

Á apotekinum eru útbúgvin starvsfólk altíð tilreiðar at kunna og hjálpa tær, skuldi tú havt fyrispurningar um hoyfepur og viðgerðina.

Kelda: Tíðindaskriv frá Apoteksverki Føroya www.apotek.fo