Norðoyggjar missa 30 prosent í Barentshavinum
Hanus Hansen, reiðari, sigur í eini viðmerking, at JFK Trol fer at missa nógv rættindi í Barentshavinum, um fiskivinnunýskipanaruppskotið verður samtykt, sum tað nú liggur.
“Um fiskivinnuuppskotið hjá landsstýrinum verður samtykt í verandi líki, so fara Norðoyggjar at missa 30 % í Barentshavinum.” Tað sigur Hanus Hansen reiðari.
Hann hevur saman við fakfólki gjørt nakrar útrokningar, sum eru bygdar á uppskotið hjá landsstýrinum, sum tað sær út, nú tað fer til fyrstu viðgerð í løgtinginum.
“Um heildarkvotan fyri 2018 verður á sama støði sum hon hevur verið trý tey seinastu árini, so verða 30 % færri til Norðoyggjar,” sigur Hanus Hansen.
Hann vísir á, at í lógaruppskotinum stendur, at landsstýrismaðurin kann nýta 5 % av heildarkvotuni til fiskivinnuroyndir (eisini nevndar økiskvotur), og at hann skal selja 25 % á uppboðssølu.
“Hetta merkir, at íalt 30 % av heildarkvotuni í Barentshavinum kunnu verða lutað út ella seld øðrum enn teimum, sum hava havt hesi rættindi í mong ár,” sigur Hanus Hansen.
Hann kemur til ta niðurstøðu, at JFK Trol fer at missa eitt árligt virði á góðar 70 mió. krónur, sum er tað sama, sum Sjúrðaberg fiskaði fyri í fjør.
“Tað vil siga, at grundarlagið hjá Sjúrðarbergi verður burtur í 2018,” sigur Hanus Hansen. Í hýrum svarar hetta til góðar 29 mió. krónur, sum í minsta lagið 30 familjur hava havt sum inntøkugrundarlag.
“Fyri JFK Trol fer hetta at hava við sær, at grundarlagið at stuðla upp undir alt annað virksemi hjá samtakinum versnar,” sigur reiðarin.
Hanus Hansen sigur við R7, at JFK Trol kann bjóða á uppboðssøluni, men teirra royndir frá fyrru uppboðssøluni vísa, at teir fáa einki burturúr tí. Ein annar trupulleiki er, at felagið, orsaka av antitrust-markinum, ikki hevur nakrar vissu fyri at kunna bjóða uppá langtíðarrættindi.
“Tað er ómøguligt hjá felagnum at liggja við eyka skipi og manning, sum ikki veit sær nakað fast,” sigur Hanus Hansen.
Hann vísir á, at Føroyar eru í stríði við Noreg um áseting av pelagiskum kvotum, og tí eru sannlíkindi fyri, at tað ikki verður møguligt at fáa avtalu við Noreg í 2018 um Barentshavið. Um so verður, minkar kvotan hjá JFK Troli heili 6.154 tons ella við næstan eini helvt í mun til 2015.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur