KÍ og Víkingur renna undan
Hjalgrím Elttør gjørdi klaksvíkingum norðoyastevnuna enn søtari, meðan Víkingur fekk ein lættan sigur á Skála. Við Stórá tók EB/Streymur suðuroyingarnar á bóli.
Norðoyastevnan gjørdist enn betur fyri klaksvíkingar, tá Hjalgrím Elttør við sínum fyrsta máli í ár tryggjaði KÍ øll trý stigini móti 07 Vestur.
Fyrrverandi landsliðsleikarin var á rætta stað seks minuttir eftir steðgin, tá hann skjeyt ein leysan bólt í netið, eftir upplegg frá Jóannesi Bjartalíð. 07 Vestur var væl við, og trýsti eisini heimaliðið móti endanum, men mátti aftur gjøgnum undirsjóvartunnlarnar við ongum. Klaksvíkingarnir hava nú 22 stig á fyrsta plássi í Effodeildini.
Víkingur væntaði sær helst ein torførari dyst enn tann, sum teir fingu ímóti Skála í dag. Støðan í hálvleikinum var 3-0, og tá var dysturin í roynd og veru avgjørdur. Adeshina Lawal skoraði tvær ferðir eftir deyðbólt, og Sølvi Vatnhamar økti, tá hann vann bóltin av Jákupi Jacobsen. Í seinna hálvleiki skoraði Gunnar Vatnhamar til endaliga úrslitið 4-0.
HB kom aftur á beint á heimavølli móti ÍF. Aleksander Stankov og Rókur av Fløtum Jespersen løgdu HB framum 2-0, men Andy Olsen minkaði um munin eftir steðgin. Stankov økti aftur, men beint aftaná minkaði Ndende Adama Gueye um munin til 3-2. Dánial Pauli Lervig avgjørdi kortini dystin til fyrimuns fyri HB, sum sostatt fekk trý týðandi stig.
EB/Streymur tók TB/FCS/Royn á bóli, og vann trupla útidystin 2-1. Suðuroyingarnir sótu á øllum í fyrra hálvleiki, og Stefan Radosavljevic legði eisini heimaliðið framum. Eftir steðgin var søgan ein onnur. Jóhannes Hansen javnaði fyrst, áðrenn Leif Niclasen avgjørdi dystin fyri útiliðið, tá hann lyfti bóltin uppum málverjan hjá suðuroyingum.
Síðsti dysturin hetta umfarið verður millum NSÍ og B36 í Runavík mánakvøldið klokkan 18.00.
KÍ-07 Vestur 1-0 (0-0)
1-0: Hjalgrím Elttør, 51.
Víkingur-Skála 4-0 (3-0)
1-0: Adeshina Lawal, 12.
2-0: Adeshina Lawal, 30.
3-0: Sølvi Vatnhamar, 39.
4-0: Gunnar Vatnhamar, 55.
HB-ÍF 4-2 (2-0)
1-0: Aleksandar Stankov, 3
2-0: Rókur av Fløtum Jespersen, 26.
2-1: Andy Olsen, 52
3-1: Aleksandar Stankov, 75
3-2: Ndende Adama Gueye, 77
4-2: Dánial Pauli Lervig, 84
TB/FCS/Royn-EB/Streymur 1-2 (1-0)
1-0: Stefan Radosavljevic, 35.
1-1: Jóhannes Hansen, 85.
1-2: Leif Niclasen, 90.
Mest lisið í farnu viku
Samband
Heygsvegur 8
490 Strendur