Á aðalfundinum hjá SEV í dag varð uppskot lagt fram um at eftirmeta allan bygnaðin hjá SEV. Heðin Mortensen byrjaði aðalfundin við at greiða frá, at Torbjørn Jacobsen og hann vegna kommunurnar, og sum formansskapur í Kommunufelagnum, hava lagt fram uppskot fyri aðalfundin um at eftirmeta bygnaðin hjá orkufelagnum SEV.

Ítøkiliga mæla teir til, at eftirmetingin verður fyriskipað av einum bólki við 5 borgarstjórum, umframt nýggja nevndarformanninum í SEV, Kára Johansen.

Heðin Mortensen segði, at tað er eingin loyna, at SEV seinnu árini í fleiri umførum hevur verið fyri ákoyringum. Í nógvum førum kanska av órøttum, men aðrar tíðir kanska av røttum. Tó heldur hann, at leiðsla og starvsfólk hava gjørt eitt megnar arbeiði, og eftirmetingin er tí ikki ein beinleiðis kritikkur av teimum.

Hann vísti á, at samfelagið er nógv broytt seinnu árini, og serliga innan orkuøkið hevur broytingin verið stór. Hinvegin er bygnaðurin hjá SEV ikki broyttur nakað stórvegis, og hetta hevur eisini verið ein av høvuðsatfinningunum móti SEV.

Bæði landspolitiskt og í miðfyrisitingini hevur mann í fleiri umførum ætlað sær at gjørt grundleggjandi broytingar viðvíkjandi SEV. Enntá hava beinleiðis ætlanir verið um at ognartaka SEV. Innanhýsis hava eisini verið ætlanir um at broyta bygnaðin, millum annað við at fáa størri fakligheit inn í nevndina í SEV.

Heðin Mortensen segði, at bólkurin má taka henda kritikk til eftirtektar, tí mugu eigararnir skjótast  fáa í lag eina skipaða eftirmeting av bygnaðinum í SEV.   

At so hesin leisturin varð valdur stendst av, at fult gjøgnumskygni og opinleiki skal vera um eftirmetingina. Øll ynskja, at SEV skal verða ein vælvirkandi stovnur, sum allir føroyingar umvegis kommunurnar eiga, ein stovnur, hvørs endamál framhaldandi verður at veita øllum landsins borgarum orku á einum tryggum og samhaldsføstum grundarlagi.

Heðin Mortensen segði, at full undirtøka er fyri hesi ætlan í stýrinum í Kommunufelagnum, sum umboðar allar landsins kommunur. Uppskotið um nýggjan bygnað verður lagt fram á eykaaðalfundi seinri í ár. 5 borgarstjórar og nevndarformaðurin fyri SEV manna sum sagt eftirmetingarbólkin, sum sjálvur tilevnar arbeiðssetningin og útvegar sær neyðugan førleika fyri at røkka skilabesta úrslitinum.

Borgarstjórarnir í eftirmetingarbólkurin eru Heðin Mortensen, Tórshavnar kommuna, Karl H. Johansen, Klaksvíkar kommuna, Torbjørn Jacobsen, Runavíkar kommuna, Bjarni Prior, Vága kommuna og Kristin Michelsen, Tvøroyrar kommuna.

Formansskapurin