Nú eru tríggir flokkar á Kvøldskúlanum, har undirvíst verður fyri útlendingum í føroyskum máli og føroyaskari mentan.

Bergljót av Skarði, sum annars hevur verið álitið í undirvísingini fyri útlendingum á Kvøldskúlanum í mong Harrans ár, er framvegis tøk hjá Kvøldskúlanum til ávísar uppgávur.

Bergljót vitjaði á skúlanum nú ein dagin og skrivaði í einum bloggi, at tað er so hugfarsligt, at lærugreinin "Føroyskt sum annað mál" (FSA) trívist og veksur.

Helena Dam á Neystabø frá Mentamálaráðnum hevur arbeitt og arbeiðir við próvtøkum til hesa lærugrein í fyrimyndarligum samstarvi við Katrin E.L.Jacobsen, sum hevur royndir á økinum úr Danmark. Somuleiðis er arbeiði sett í gongd at gera bøkurnar hjá Bergljót (Vælkomin, Viti) meiri brúkaravinarligar við upplestri og fleiri uppgávum.

- Kvøldskúlin hevur miðvíst arbeitt við hesum evni í nógv ár. Samstarvspartnarar hava ofta verið lunkaðir, nógvir fundir, ráðstevnur og skeið hava verið. Nógvir teldupostar eru sendir til MMR, játtanir og grundgevingar. Men tolin trívst og treiskin vinnur, sigur orðatakið.

- Nú í 2021 er tað politiskt korrekt at tosa um málundirvísing sum part av integratión. Samstarvspartnarar, Reyði krossur, integratiónsprestur koma á gátt og bjóða sínar tænastur, MMR veitir játtan, skeið hevur verið í CEFR, skrivar Bergljót.

Í vikuni var ph.d. ritgerð løgd fram um málsligan ójavnað og forðingar fyri útlendingar á arbeiðsplássum. Sumt er broytt og annað er í broyting. Mál er vald, at hava orðið í síni makt er vald. Um málið verður tikið frá tær, minkar tú sum menniskja. Tú skapar ójavnað, og varðveitir ójavnað, um tú forðar fólki í at tala og siga sína meining og taka lut í samfelagnum. 

- Nú eru tríggir flokkar. Jóna og Vár eru lærarar í tí nýggja flokkinum. Fólk úr øllum heiminum hava funnið veg í J.H. Schrøtersgøtu. Úr USA, Brasil, Filipsoyggjum, Jordan, Turkalandi og øðrum londum.

- "Upptøkuroynd" var, visitatión, og spennandi er at fylgja við, hvørjum støði flokkarnir eru á, CEFR hevur jú síni støði og stig. Vit eru á veg! Alt tekur tíð, vit eru komin væl í gongd, haldi eg. Úrslitið sæst um nøkur ár.

Bergljót stakk inn á gólvið hjá Petru, sum hevur millumflokkin, altíð deiligt at hitta eldsálirnar. Tær sungu "Sjeikin" hjá NALJU. Hon elsar lagið, sum kann syngjast ordiliga hart!

Og síðani inn til Annu Marjuna, tosaðu um, at nú eru tær 4 lærarar, nóg nógvar til at skipa lærarafund. Eitt so frálíkt hugskot, sjálvandi skula tær tosa sínamillum um støðið í teimum ymsu flokkunum, um onkur næmingur skal hava serligt ansni, um tilfar, læna hvørjari aðrari heimagjørt tilfar osfr.

- Enn er nógv eftir at gera. Til dømis manglar tilfar til "alfabetisering" av vaksnum, t.e. fólk sum hava eitt annað alfabet enn okkara, ella møguliga einki alfabet (analfabetar). Vit hava ikki nógvar tilflytarar, sum hvørki duga at lesa ella skriva, men við tí vaksandi tali av tilflytarum verða fleiri av teimum eisini, sigur Bergljót av Skarði, sum heldur at tað er herligt at fylgja við á síðulinjuni.