Fyrsta mál á skránni er 1. viðgerð av einum uppskoti frá Sirið Stenberg, landsstýriskvinnu í Heilsu- og Innlendismálum. Tað uppskotið snýr seg um at høvuðsumvæla, útbyggja og nútíðargera Landssjúkrahúsið. Ætlanin er at játta 427, 6 mió kr., í fýra ár, til bygging av nýggjum bygningi. Nýggi bygningurin skal húsa psykiatriskum depli, medisinskum seingjastovnum, føðideild, endurvenjingarhølum, nýggjum køki og kantinu. Eftir viðgerðina verður málið sent í Fíggjarnevndina.

Seinna málið er eitt uppskot til samtyktar ið Bjørn Kalsø hevur lagt fyri Tingið. Sambært uppskotinum skal landsstýrið virka fyri at allar skúlabøkur eisini skulu fáast sum ljóðbøkur. Tað málið fer í Mentanarnevndina.

Fyrispurningarnir, ið skulu svarast, eru frá Sonju Jógvansdóttir og Annitu á Fríðriksmørk.

Sonja spyr Henrik Old um, hvørjar ítøkiligar ætlanir landsstýrið hevur fyri at røkka hugsjónini um, at eingin skal doyggja ella fáa álvarsligt mein í føroysku ferðsluni.

Annita spyr Kristinu Háfoss um fíggjarligu støðuna hjá teimum við lág- og miðalinntøkum.

Tingfundurin í morgin byrjar kl. 11