ES letur 25 mia kr. um ári í stuðli til fiskivinnuna
Í september 2011 almannakunngjørdi felagsskapurin Oceania eina kanning av stuðli til fiskivinnuna í ES í 2009. Og kanningin vísti, at stuðulin til fiskivinnuna í ES var 3 ferðir so stórur sum áður mett.
ES fiskaði 4 mió. tons í egnum sjógvi og 1 millión tons aðrastaðni. Í alt fiskaði ES 5 mió. tons. Tað starvast 140.000 fólk í fiskivinnuni í ES. 35.000 av hesum starvast í Spania. Í Italia og Grikkalandi starvast umleið 25.000 fólk í hvørjum landi.
ES hevur nógvar ymiskar stuðulsskipanir til fiskivinnu. Stuðul verður latin til nýbygging og upphøgging av skipum. Útjaðaramenning fær stuðul og stuðul verður eisini latin til keyp av olju og keyp av fiskirættindum í øðrum londum.
Samlaður stuðul var 25 mia kr. Tað svarar til 50% av virðinum á øllum fiskinum sum ES lond fiskaðu.
Kanningin vísur eisini, at 13 ES lond fingu meira stuðul enn samlaða avreiðingarvirði á øllum avreiddum fiski í 2009. Póland fekk 9 ferðir so nógvan stuðul sum samlaða avreiðingarvirðið. Tað er ivaleyst ein av orðsøkunum til at nógv framleiðsluvirkir eru í Pólandi.
Mest lisið í farnu viku
Samband
Heygsvegur 8
490 Strendur