Veðurstøðin til Klaksvíkar
Her er ein mynd av tveimum hugagóðum veðurmonnum. Tey flestu hava hoyrt teirra røddir í Kringvarpinum. Rúnar Alix Rasmussen er útbúgvin meteorologur, og Hanus Kjølbro er sjómansskúlalærari og veðurkønur.
Tað verða skjótt fimm ár síðani, at hendan myndin varð tikin á trappusteininum hjá Hanusi norðuri á Viðareiði.
Tað er lætt at rokna út, hvat hesir báðir skilamenninir tosa um. Báðir vilja ganga undan í eini spennandi verkætlan. At byggja upp nakað, sum føroyingar ikki eiga frammanundan. Nevniliga okkara egnu veðurtænastu.
Frá fyrsta degi varð Klaksvík mett at vera ein góð staðseting fyri eina komandi veðurstøð. Á tingi tosa bæði kvinnur og menn um desentralisering. Hetta var kanska tann rætta løtan. Stigtakararnir eru norðoyingar. Og um hetta mundið er
Turið Laksá, sum nýliga var útbúgvin meteorologur, eisini flutt til Viðareiðis at búgva. Tað rættasta var sjálvandi at leggja eina veðurstøð, har vitanin, serfrøðin og áhugin frammanundan er tilstaðar. Sjónám í Klaksvík var eitt sera gott boð.
Búðu hugskotsmenninir í Vágunum ella kom initiativið úr Havn, so var støðan møguliga øðrvísi.
Nógv hjartablóð er hesi árini runnið í havið. Men loksins skuldu føroyingar bæði á sjógvi, landi og á flogi fáa eina meiri álítandi veðurtænastu.
Eftir ein strævnan burð, skuldu øll í dag verið glað. Men hvat hendir?
Fleiri munnu standa spyrjandi. Hví skal ein myndugleiki í Havn tvangsflyta barnið til stjóran í Vørn at vara av, tá alt riggaði so væl í Klaksvík.
Hvar er virðingin fyri teimum, sum eiga hugskotið og alt stríðið aftanfyri verkætlanina. Er tað so, at politikarar og embætisfolk gloyma ta nátúrligu drívmegina, sum býr í einstaklinginum. Tey vøkru málini, sum mong so íðin kempa fyri. Heimið og familjuna. Nærumhvørvið og trivnaðin. Tað meiningsfulla arbeiðið.
Høgni Hoydal kundi í síni setu sum fiskimálaráðharri lagt veðurtænastuna í Klaksvík. Men hann var ov seinur á sjóvarfallinum. Nú liggur avgerðin hjá Jacob Vestergaard og verandi samgongu.
Men hetta er ikki eitt partapolitiskt mál. Altíð ræður tað um at lofta og løna einum góðum hugskoti. At síggja ta mest upplagdu loysnina.
Hvar skilamenninir á myndini ætlaðu at leggja føroyska veðurstøðini skuldi ikki verið so torført at rokna út.
Men politikkur er óútrokniligur. Tað verða vit í heilum mint á. Vága Floghavn ella onkur annar stovnur kundi havt gjørt fyrireikandi arbeiði til eina føroyska veðurstøð fyri mongum árum síðani. Ella ein politiskur flokkur kundi havt slóðað fyri. Men kanska hava almennu Føroyar bíðað eftir at fáa hetta borið upp í hendurnar.
Um so er, væl gagnist!
Veit ikki, um eg líka hugagóður hevði koyrt bróður norður til Viðareiðis hetta kvøldið, um eg frammanundan visti, at norðoyingar ikki fóru at fáa sín sjálvsagda part í veðurstøðini.
Mest lisið í farnu viku
Samband
Heygsvegur 8
490 Strendur