Bill Justinussen spyr Henrik Old um Barsilsskipanina
Bill Justinussen, løgtingsmaður fyri Miðflokkin, vil hava at vita hvat tað hevði kosta, um øll høvdu rætt til eitt minstagjald úr barsilsgrunninum
Hvussu nógv hevði tað kostað barsilsskipanini árliga, við sama føðitalið sum í 2016, um øll, í sambandi við barnsburð eftir verandi skipan annars, høvdu rætt til eitt minsta útgjald úr barsilsskipanini á kr. 8.000,00 um mánaðin, tó so, at tey, sum hava rætt til útgjald eftir aðrari skipan, t.d. forsorgarlógini, lestrarstuðulsskipanini ella familjuískoytisskipanini, fyrst fáa tann partin útgoldnan og síðani ískoyti úr barsilsskipanini upp til nevnda mark, um rætturin til tað útgjaldið er niðan fyri kr. 8.000 um mánaðin?
Tað vil Bill Justinussen hava Henrik Old at svara uppá.
Í viðmerkingunum sigur Bill at "Ein kvinna, sum er undir útbúgving og ikki hevur havt lønandi inntøku seinastu 3 árini, hevur ikki rætt til gjald úr barsilsskipanini.
Hetta kann tykjast órímiligt í mun til ætlanir landsins um at styðja øll átøk fyri at vaksa um fólkatalið. Sæð í eini heild er tað eisini órímiligt, at tey, sum hava arbeitt, áðrenn tey fáa børn, hava betri rætt til gjald úr barsilsskipanini enn tey, sum fara at arbeiða, aftaná at børnini eru komin."
Bill vísur eisini á at ein familja, sum raðfestir at nema sær útbúgving og samstundis stovna familju við børnum, er sett í verri støðu enn ein familja, har bæði foreldur hava inntøku av arbeiðsmarknaðinum. Yvir eitt heilt arbeiðslív hava bæði tann familjan, sum fær børnini, meðan tey eru undir útbúgving og hin familjan, har børnini koma, meðan foreldrini eru á arbeiðsmarknaðinum, avrikað á leið tað sama og goldið á leið tað sama í barsilsskipanina.
Løgtingsmaðurin heldur tí, at "tað er órættvíst, at ikki øll eru eins fyri lógini um barsilsskipan – uttan mun til, hvar á lívsleiðini tey eru stødd, tá børnini koma. Spurningurin leggur upp til, at øll kunnu fáa eitt minstagjald úr skipanini og at kostnaðurin av hesum verður ásettur."
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur