Manning, ið longu hevur sitið næstan 7 ár av dómi sínum, verður væntandi leyslatin 17 mai í ár. Umframt Manning, so hevur Obama náða James E. Cartwright, fyrrverandi general, fyri at hava logið fyri F.B.I. agentum um samrøður ið Cartwright hevði við fjølmiðlafólk. Í hesum samrøðum skal Cartwright hava givið fjølmiðlunum loyniligar upplýsingar um telduálop ið USA hevur framt á atomverkætlanina hjá Iran.

Avgerðirnar hjá Obama eru merkisverdar fyri eina umsiting, ið hevur gjørt nógv burturúr at rættarsøkja tey ið ólógliga leka loyniligar upplýsingar. Í embætistíðini hjá Obama hava amerikonsku mynduleikarnir rættarsøkt persónar í 10 líknandi málum. Tað er meir enn allir undanfarnir forsetar tilsamans.

Men avgerðin er ikki fallin í góða jørð allastaðni. Bæði Mac Thornberry og John McCain, ið eru formenn verjunevndirnar í ávikavist umboðsmannatinginum og senatinum og Paul Ryan, formaður í umboðsmannatinginum hava funnist at avgerðini. Jerry Boykin, fyrrverandi generalur og leiðari fyri servandu Delta Force deildirnar hevur eisini funnist at avgerðini. Samanumtikið eru teir ónøgdir við at ein persónur, ið við at leka loyniligar upplýsingar setur lívið hjá amerikonskum herfólki í vanda ikki skal bøta fyri síni lógarbrot.

Bradley Manning kunngjørdi fyri tíð síðan, at hann er transkyndur (t.e. er ein kvinna í mannfólka kroppi), og hevur síðani broytt navn til Chelsea Manning. Advokatarnir hjá Manning hava roynt at fingið amerikonsku hernaðarmyndugleikarnar at viðurkenna samføringina hjá Manning, og at loyva honum at skifta kyn.