Á tímatalvuni hjá 5.a og b stóð "náttúra og tøkni", men mikudagin í síðstu viku var skráin serlig. Næmingarnir sluppu nevniliga at royna seg við at forrita. Flokkarnir 5.a og 5.b vóru lagdir saman og kantinan á skúlanum var skúlastovan.

39 næmingar, tveir lærarar og tveir gestir frá KT-felagnum luttóku.

"Børn og lærarar vóru glað fyri tiltakið" - segði Dan Lamhauge, lærari hjá 5.a. "Fyri at fleiri børn skulu fáa ágóðan av hesum tiltakinum ynski eg eisini at royna eitt fyribrigdi, vit kalla "børn læra børn." Hetta verður gjørt við, at tveir flokkar verða lagdir saman og tey, sum hava #rita1tíma skulu síðani hjálpa teimum, sum ikki hava roynt tað. Soleiðis kunnu fleiri fáa nógv burtur úr slíkum tiltaki."

KT-felagið fegnast um, at skúlarnir taka so væl í móti tiltakinum #Rita1tíma.

KT-felagið hevur sett sær sum mál, at allir fólkaskúlanæmingar í Føroyum skulu sleppa at royna #Rita1tíma í 2017. Í hesum sambandi verður leitað eftir ágrýtnum lesandi at hjálpa KT-felagnum at samskipa átakið.

Endamálið við átakinum er at økja um kunnleikan til forritan. Hetta verður gjørt við at bjóða skúlum møguleika fyri at fáa starvsfólk úr KT vinnuni inn um skúlagátt at undirvísa næmingum í grundleggjandi forritan. Tann lesandi skal samskipa skúlavitjanir og møguliga eisini saman við einum starvsfólki úr KT vinnuni undirvísa næmingum í forritan, tá farið verður á skúlavitjanir.

Kelda: Industry.fo