Tað stóð á gomlum nøglum tá lítil hálvur minuttur var eftir av dystinum. Føroysku U21-spælararnir - við einum manni færri á vøllinum - hildu kortini høvdini køld, tá harðast leikaði á, og bert eitt mál var á muni, og fingu hálað sigurin heim móti favorittunum úr Suðurkorea.

Føroyar tóku time-out við 20 sekundum eftir á klokkuni, og hóast tveir føroyskir møguleikar vórðu misnýttir hesa síðstu løtuna, var tað kortini nóg mikið, tí tíðin fór, áðrenn mótstøðuliðið aftur fekk fatur á bóltinum, og teir hvítu kundu sleppa gleðini leysari.

Okkara spældu ein skilagóðan fyrra hálvleik, løgdu seg á odda fyrstu ferð eftir seks minuttum og støðan í steðginum var eisini 16-12 til Føroyar.

Seinni hálvleikur byrjaði væl, men tá trý korter vóru spæld otaði Suðurkorea seg alsamt nærri, og eina løtu var eitt mál á muni. Føroyar hildu kortini fast, og løgdu nakað av sjógvi ímillum aftur.

Síðstu minuttirnar kom eitt sindu av fjáltri á føroysku spælararnar, og eftir at Føroyar fingu eina útvísing við hálvum øðrum minutti eftir at spæla, minkaði mótstøðuliðið um munin til 28-27. Hóast nógv stóð á - bæði á og uttanfyri vøllin, hildu føroyingarnir fast, og tryggjaðu sær ein ótrúligan flottan sigur.

Føroyar hava - kanska heldur óvæntað - fult stigatal eftir sigrar á Kili og Suðurkorea. 

Føroyar - Suðurkorea 28-27 (16-12)

Málskjúttar: Hilmar Leon Jakobsen 6, Helgi H. Hoydal 5, Pætur Thomsen 5, Sjúrður Olsen 3, Kjartan Johansen 3 (1), Jónas G. Djurhuus 2, Pætur Mikkjalsson 2, Teis Horn Rasmussen 1, Áki Egilsnes 1