Sambært heimasíðuni hjá Setrinum komu akademisku fyrilestrarhaldararnir frá ymiskum fakligum siðvenjum, stovnum og universitetum, m.a. úr Gibraltar, Onglandi, Írlandi, Skotlandi, Spania, Danmark, Grønlandi og Føroyum.

Parlamentarikararnir vóru m.a. úr Føroyum, Gibraltar og Barcelona.

Evnið á ráðstevnuni - fólkaatkvøður og sjálvsavgerðarrættur - var serliga viðkomandi í samband við Brexit og fólkaatkvøðuna í Katalonia.

Fyri Gibraltar, sum hoyrir til og ynskir at hoyra til ensku krúnuna og samstundis ynskir at vera verandi í ES, hevur hetta evnið serligan týdning í sambandi við Brexit. Meðan bretar hava viðurkent, at Gibraltar hevur sjálvsavgerðarrætt, so metir Spania økið vera spanskt og krevur, at tað gerst partur av Spania.

Í Føroyum hevur hetta evnið leingi verið viðkomandi og tað hevur fingið nýggjan týdning og áhuga - eisini uttanfyri Føroyar - í samband við ætlaðu fólkaatkvøðuna í 2018.

Hans Andrias Sølvará helt á ráðstevnuni fyrilestur undir heitinum “The Faroe Islands – from Norwegian dependency to self-determination in the Danish State”, meðan Kristianna Winther Poulsen helt fyrilestur við heitinum “Towards a constitution for the Faroe Islands”.

Hetta er altjóða ráðstevna, sum The Gibraltar Garrison Library skipar fyri á hvørjum ári