Grønlandi tørvar útbúnar lokalar yvirmenn. Ein stórur partur av verandi yvirmonnum nærkast pensjónsaldri, og tí hevur tað skund at finna avloysarar. Sum er eru hesir tó langt frá tøkir, staðfestir grønlendska arbeiðsgevarafelagið, GE.

Svarið frá størsta politiska flokkinum í Grønlandi, Siumut, er ein áheitan í gjár á heimasíðuni hjá grønlendska kringvarpinum, KNR, um at GE luttekur í menniningi av grønlendska samfelagnum og at brúka lokala og aðra arbeiðsmegi, sum er fús at búgva í Grønlandi.

Grønlendska fiskimálaráðið hevur sent nýggju manningarkrøvini til hoyringar við svarfreist 31. oktober. Longu dagin eftir kemur kunngerðin um nýggju reglurnar í gildi, tvs.1. november.

- Gera vit ikki okkurt, so verða møguleikar okkara at verja landsins røttu íbúgvar og tey "heimahoyrandi", sum ynskja at verða búgvandi her, avmarkaðir, sigur politiski framsøgumaðurin hjá Siumut í fiskivinnumálum, Jess Svane.

Heimahoyrandi yvirmenninir eru sambært nýggju manningarreglunum teir, sum hava verið skrásettir sum búgvandi í Grønlandi í minst 24 mánaðir.

Tað kann tó taka longri tíð enn ætlað at røkka málinum um økta partin av heimahoyrandi yvirmonnum, ásannar Siumut.

- Málið er, at minst 90 prosent av yvirmonnunum skulu vera heimahoyrandi í 2020. Tað merkir tó ikki, at vit klára at lúka kravið, longu dagin eftir at kunngerðin er komin í gildi. Vit skulu arbeiða fram ímóti hesum, sigur Jess Svane.

GE sigur í aftursvari, at tey eru til reiðar at taka av innbjóðingini um samstarv.