Valspenningurin í Íslandi økist
Bæði Vinstri grønu og Sjálfstæðisflokkurinn missa undirtøku, meðan Samfylkingin vinnur fram, vísir nýggj veljarakanning, sum Market og Media Research (MMR) Reykjavík hevur gjørt.
Sambært kanningini hevur Sjálfstæðisflokkurinn við Bjarna Benediktsson forsætisráðharra á odda (myndin) nú størstu undirtøkuna millum íslendsku veljararnar av teimum 11 flokkunum, ið stilla upp.
Sjálfstæðisflokkurinn fær sambært kanningini 19,9%. Vinstru grønu liggja beint aftanfyri við 19,1%.
Kanningin varð gjørd dagarnar 17. og 18. oktober.
Bæði Sjálfstæðisflokkurin og Vinstru grønu missa tó undirtøku úr ávikavist 21,1% og 21,8% í síðstu kanningini hjá MMR 11. oktober.
Samstundis økist undirtøkan fyri Samfylkingini úr 13% til 15,8%. Síðst í september gav ein veljarakanning hjá MMR Samfylkingini 10,4% av atkvøðunum. Sostatt er undirtøkan fyri Samfylkingini økt við 5,4 prosentstigum seinasta mánaðin.
Píratar fáa sambært nýggjastu veljarakanningini 11,9% av atkvøðunum, Miðflokkurinn 11,0%, Framsóknarflokkurin 8,%, Viðreisn 6,7%, Flokkur fólksins 5,3% Bjørt framtíð 1,6%. Aðrir flokkar fáa 0,8% samanlagt.
Tilsamans tóku 1.007 fólk lut í kanningini, 18 ár og eldri.
Mest lisið í farnu viku
Samband
Heygsvegur 8
490 Strendur