Óluva Klettskarð : Eg fari ikki at taka undir við at 400 størv hvørva í Klaksvík
Tjóðveldistingkvinnan úr Norðoyggjum sigur seg ikki kunna góðtaka eina lóg, ið ávirkar Klaksvíkina so ógvusliga.
Hanus Hansen, reiðari í Klaksvík, hevur fleiri ferðir boðað frá, at ætlaða fiskivinnunýskipanin fer at fáa sera stórar avleiðingar fyri virksemi hjá JFK. Í vinnunevndini endurtók samtakið hendan boðskapin, og vísti á at eini 400 fólk fóru at missa starvið.
R7 fekk fyrrapartin orðið á Óluvu Klettskarð fyri at fáa hennara viðmerking til tølini hjá JFK-samtakinum.
“Eg fari ikki at taka undir við eini lóg ið kostar 400 arbeiðspláss í Klaksvík,” sigur hon. Men hon leggur afturat, at enn hevur hon ikki fingið váttað at tølini eru í trá við veruleikan. Tann váttanin skal koma úr fiskimálaráðnum sigur hon og leggur afturat, at endamálið er sjálvandi ikki at taða fyritøkurnar sundur, men at tryggja at tær kunnu virka og mennast.
Spurd hvussu hon fór at fyrihalda seg, um so er at tølini hjá JFK vístu seg at vera røtt segði hon, at í so fall kundi hon ikki góðtaka ætlaðu skipanina.
“So fari eg at gera mína ávirkan galdandi fyri at fáa tað broytt soleiðis at avleiðingarnar ikki vera so ógvusligar”, sigur hon.
Óluva Klettskarð vildi tó ikki vátta, at hon fór at atkvøða ímóti uppskotinum um so var at hon ikki fekk undirtøku fyri broytingum, men væntaði at hon fór at fáa sín vilja, segði hon at enda.
Mest lisið í farnu viku
Samband
Heygsvegur 8
490 Strendur