Her søkkur spildurnýggjur brunnbátur
Tann 70 metrar langi brunnbáturin við norsktljómandi navninum "Seikongen" var heimahoyrandi í kilenska laksahøvuðsstaðnum Puerto Montt.
Báturin sakk út fyri kilensku strondini kl. 11 lokala tíð fyrrapartin, skrivar iLaks.
Empresas Maritimas of Chile eigur nýbygda bátin, sum var leigaður út til børsskrásetta felagið Camanchaca.
– «Seikongen» sendi út neyðarkall klokkan 1050, eftir at vera farin úr Puerto Montt, upplýsir Miguel Angel Bravo, havnarstjóri í Puerto Montt, fyri kilenska netmiðlinum Efeverde.com.
Brunnbáturin er heimahoyrandi í kilenska laksahøvuðsstaðnum Puerto Montt.
Báturin sakk út fyri býnum Chonchi, beint sunnanfyri Castro á Isla Chiloé har suðuri í Kili.
Hetta er mitt í týdningarmesta aliumráðnum í landinum, Region X. Umleið 80 prosent av kilenska laksinum verður framleiddur her.
Spildurnýggjur
Brunnbáturin er spildurnýggjur, bygdur á eini skipasmiðju í Hong Kong fyrr í ár. Sambært iLaks hevði báturin bert verið í drift í ein mánaða, nú hann sakk.
Skiparin náddi at fáa bátin inn á grunt vatn, áðrenn hann sakk.
Báturin liggur á tíggju metra dýpi.
Manningin, ið taldi 11 mans, kom frá hendingini í øllum góðum. Umleið 200 tons av laksi og 70 tons av brenniolju eru umborð.
Kilenska sjóverjan og væl mannað bjargingarlið eru á staðnum, upplýsir RadioChile.
Ikki er greitt, hvat orsøkin var til, at báturin sakk. Veðrið var av tí besta, tá óhappið hendi.
Mest lisið í farnu viku
Samband
Heygsvegur 8
490 Strendur