Grønlendingar vilja hava sín egna banka eftir føroyskari fyrimynd
Ein stórur meiriluti í grønlendska landstinginum, Inatsisartut, tekur undir við at kanna, hvørjir fyrimunir og vansar eru við at stovna ein banka, sum grønlendingar einsamallir eiga.
Hetta kom fram í orðaskifti í landstinginum í dag, har uppskotið hjá Anthon Frederiksen úr Partii Naleraq fekk at kalla fullan stuðul. Bara Demokratarnir vóru ímóti, skrivar Sermitsiaq.
Niðurstøðan var, at pengarnir skulu vera í landinum ístaðin fyri, at teir "fossa" út úr landinum.
- Pengarnir skulu verða í landinum, so býir og bygdir fáa møguleika at lána pengar. Teir møguleikarnir eru sera avmarkaðir í dag, staðfesti Hans Enoksen, landsstýrismaður í vinnulívsmálum, sum helt, at landið hevði tikið eitt risastig framá við egnum banka.
- Vit kunnu saktans, staðfesti Hans Enoksen.
Føroyar fyrimynd
Hann vísti á, at grønlendingar kunnu fáa íblástur úr Føroyum, har fleiri peningastovnar eru, og har tað gongur væl.
- Teir eru øvundaverdir, segði Anthon Frederiksen um bankarnar í Føroyum. Og hann sá fram til, at Grønland fær sín egna myntfót, sum hevði verið eitt effektivt vápn ímóti hassjsmugling.
Jens Immanuelsen úr Siumut sær fleiri fyrimunir í at fáa innláns- og útlánsvirksemi, ið er tillagað fólksins tørv.
Demokratarnir ímóti
Randi Vestergaard úr Demokratunum boðaði frá, at Demokratarnir vóru ímóti tankunum um ein banka, sum tað almenna eigur.
- Vit hava ikki búskaparfrøðingarnar og løgfrøðingarnar, ið skulu til fyri at stovna eina slíka fyritøku, staðfesti hon og gjørdi greitt, at hon prinsipielt er ímóti almennum fyritøkum.
Mest lisið í farnu viku
Samband
Heygsvegur 8
490 Strendur