Í einum uppskoti til spurnarorðaskifti í Inatsisartut skrivar bólkurin:

- Tað er tí støða okkara, at persónar, sum eftir hálvt árs uppihald fáa valrætt, fáa ov stóra ávirkan á eina tjóð undir uppbygging.

Siumut vil tí hava eitt orðaskifti um, hvørt lógin skal broytast, og flokkurin mælir sjálvur til, at tað skulu ganga millum tvey og sjey ár, áðrenn tilkallað arbeiðsmegi skal hava atkvøðurætt.

Flokkurin krevur, at landsstýrið fer í gongd við arbeiðið, so eitt lógaruppskot kann verða lagt fram á vártinginum. Flokkurin leggur sostatt upp til, at lógin verður broytt innan landstingsvalið, sum skal haldast í seinasta lagi á heysti 2018.

Ódemokratiskt og ótakksamt

Sum reglurnar eru í dag, kann atkvøðast til landstingið, um ein hevur verið í Grønlandi seks mánaðar fyri valið, er yvir 18 ár og hevur danskan borgararætt.

Sostatt eru tað danir og føroyingar, sum sambært Siumut hava ov stóra ávirkan á Grønland.

Justus Hansen úr Demokratunum kallar uppskotið ódemokratiskt og ótakksamt:

- Vit vilja fegin hava teirra skattakrónur, men ikki geva teimum demokratisk rættindi. Hetta er óetiskt og dupultmoralskt, og Demokratarnir vóna, at onnur enn vit fara at taka frástøðu frá slíkum tonkum. Teir hoyra snøgt sagt ikki heima í einum fólkaræði, skrivar Justus Hansen í tíðindaskrivi.

Grønlendska kringvarpið KNR skrivar á heimasíðu síni, at tey arbeiða við at fáa eina viðmerking frá landstingsbólkinum hjá Siumut um, hvat tað meiri nágreiniliga er fyri ein ávirkan frá tilkallaðari arbeiðsmegi, sum Siumut ikki ynskir.