Frá kl. 11.00 til 14.00 vóru Jóannes og Anna við Magnstøðina í Klaksvík við nýupptiknum grønmeti og frá kl 14.30 til 17.00 vóru tey við Magnstøðina í Gøtudali við leskiligu vørunum. Tey selja ikki bara grønmeti men eisini epli og neytakjøt og alt er føroysk framleiðsla.

Tað eru tey bæði Jóannes og Anna sum eiga og reka Miðstovugarð. Garðurin er ein avgamal familjugarður sum hevur verið í familjuni síðani í 1500 talinum sigur Jóannes. Vit hava fingist við at velt epli og røtur síðani í sjeytiárunum. Nú eru vit farin undir at dyrka grønmeti eisini. Tað hava vit bara gjørt í eini trý ár enn sigur Jóannes og hann leggur afturat at tað er Veltan á Sandi sum leggur lunnar undir, og setur fokus á tað at dyrka grønmeti. 

-Vit vóna at vera aftur her um áleið 14 dagar siga Jóannes og Anna. Tað hevur gingið heilt væl at selja í dag. Vit seldu bilin tóman í Klaksvík og nú einans hálvur tími er eftir í gøtu er næstan alt selt her eisini. Vit komu norð við tveimum fullum bilum.

Miðstovugarður er at finna á facebook og har kunnu fólk halda eygað við hvar vit eru og selja siga tey bæði av Miðstovugari.