Tað er Daily Telegraph, ið hevur kannað lønartøl hjá kynjunum báðum og sammett bretskar við evropeiskar lønarmunir millum menn og kvinnur.

Fyrst er at siga um lønarkanningina, at munurin millum mans- og kvinnurlønir er nógv minkaður farnu 20 árini, út 28% á muni í 1997 niður í 18% í 2017.

Men enn er lønargloppið millum kynjanna størri í Bretlandi enn í Evropa.

Onnur áhugaverd staðfesting í hesi kanning er, at lítil og eingin munur er í dag á bretskum mans- og kvinnulønum í aldrinum 18 til 29 ár.

Men tá kvinnur nærkast 30 ára aldri, verður munur á, sum sagt í miðal 18%.

Kvinnurnar vinna ikki henda lønarmun innaftur, tá tær eftir barnsburðsaldur nærkast mannfólkaløn aftur í miðal.

The Telegraph skrivar, at Bretland er hitt dýrasta í Evropa at eiga børn í, m.a. tí at bretsk barnaansing kostar meiri enn hon í øðrum framkomnum londum.

Eitt barn “etur upp” heilan triðing av eini bretskari familjuinntøku sammett við bert 10% í Týsklandi og 5% í Svøríki, skrivar avísin.

Nógvar bretskar møður velja at ansa egnum børnum heima, tí tað loysir seg ikki hjá teimum at arbeiða úti og at gjalda fyri barnaansingina.

Aðrar familjur velja eina millumloysn, so mamman velur hálva arbeiðstíð úti.

Kanningin vísir eisini, at helvtin av teimum 18%, ið bretskar kvinnur fáa minni í løn enn menninir, skyldast gjaldinum, foreldur mugu av við til barnaansing.

Nakrar møður halda á við hálvari tíð, eftir at børnini eru undankomin, men hóast nógvar taka fulla arbeiðstíð tá, innheinta tær ikki ta mistu inntøkuna. Hin vegin eiga tær stóru gleðina av at hava verið um børnini, tá tey vóru smá.

The Telegraph heitir á bretskar politikarar um at gera tað so, at tað loysir seg betur enn higartil hjá bretskum familjum at eiga børn, so tær fáa fleiri børn.