Sjómanstrúboðarin var í Klaksvík og vitjaði umborð á Norðsøka
Tað sá betri út fyrr í ár. Orðini komu frá garvaða og veðurbarda útróðrarmanninum Eyðálvi Vang, tá hann í sjaskveðrinum á middegi í dag, kom aftur av útróðri við báti sínum Norðsøka.
-Fiskiskapurin var brúkiligur, tá vit taka hædd fyri at stamparnir vóru engdir til djúpt vatn og vit vóru nærum tætt uppi undir landi.
Vit høvdu onga goggu, so tað var í lagið at fáa 4000 pund á 56 stampum. Størra helvtin var hýsa- sigur Eyðálvur.
-Tað sá betri út fyrr í ár enn tað ger nú. Fiskiskapurin er so mikið smáligur, at tað nyttar einki at seta tvær ferðir í sama stað. Seinnu ferðina er einki at fáa hóast fyrra setan gav nakað av fiski.
Við Norðsøka eru 3 mans og tveir eru í skúrinum og egna. Tá teir royna á djúpum vatnið hava teir vanliga væl meiri av línu við og eru tá sum oftast fýra mans umborð.
Eyðálvur er ein av okkara garvaðu útróðrarmonnunum. Hann róði út í fleiri ár áðrenn hann gjørdist skipari og hevur nú ført útróðrarbát í 34 ár.
-Sjógvurin er ov heitur, tí hann er enn tíggju hitastig. Fiskiskapurin verður ikki betri fyrr enn hitin kemur niður á átta og helst sjey hitastig, sum er besti hitin- sigur Eyðálvur.
Sjómanstrúboðarin vitjaði umborð í Klaksvík og fekk eitt gott prát við tann fryntliga skiparan.
Bøn var eisini biðin fyri báti, manningini og teirra kæru.
Gud signi og varðveiti sjófólk okkara.
Mest lisið í farnu viku
Samband
Heygsvegur 8
490 Strendur